उद्योग वाणिज्य महासङ्घको वरिष्ठ उपाध्यक्षमा श्रेष्ठद्वारा उम्मेदवारी घोषणा
उद्योग वाणिज्य महासङ्घको वरिष्ठ उपाध्यक्षमा उमेशलाल श्रेष्ठले, उम्मेदवारी घोषणा गरेका छन् ।

काठमाडौंमा पत्रकार सम्मेलन गर्दै श्रेष्ठले, महासङ्घमा राजनीति मौलाएकाले स्वतन्त्रता पूर्वक नेपाली उद्योग वाणिज्य क्षेत्रको हितमा काम गर्न आफूले उम्मेदवारी घोषणा गरेको बताए ।

उनले साना र मझौला उद्योगी व्यवसायीको समस्यामा खासै सुनुवाइ नहुने गरेकाले आफूले उनीहरुका आवाजको सम्बोधनका लागि पनि महासङ्घको नेतृत्व गर्न चाहेको दाबी गरे ।

उनले भने ‘विगत दुईचार कार्यकालदेखि महासङ्घमा इन्ट्रेस्ट ग्रुप छिर्न लागेको, र साना तथा मझौला उद्यमीको खासै सुनुवाइ नभएको कारणले गर्दा, म आफूलाई मझौला ठान्छु र म धेरै तलदेखि माथि आएको मान्छे हुँ ।

सबै समस्या बुझेको छु, हल गर्ने तरिका पनि थाहा छ। म आफ्नो सेल्फ इन्ट्रेस्ट लिएर जाँदिन ।’

आफ्नो उम्मेदवारी घोषणा गर्दा श्रेष्ठले महासङ्घमा जाँदा निस्वार्थ रुपमा काम गर्ने जिकिर गरे । महासङ्घमा जाँदा सबैले निस्वार्थ काम गर्छु नै भन्छन्, तपाईँलाई विश्वास गर्ने आधार के हो भन्ने प्रश्नमा उनले भने, ‘म निस्वार्थ काम गर्ने मान्छे हुँ । अहिले भर्खर छिरेको होइन । म चेम्बर आन्दोलनमा विगत तीस वर्षदेखि छु ।’

श्रेष्ठले लामो समयदेखि भूँई मान्छेबाट यहि क्षेत्रमा कार्य गर्दै आएकोले आम उद्योगीको विश्वास नै आफ्नो चुनाव जित्ने बलियो आधार भएको बताएका छन् ।

महासङ्घको विधानमा वरिष्ठ उपाध्यक्ष स्वतः पछिल्लो कार्यकालको अध्यक्ष रहने व्यवस्था रहेकाले यो पद विशेष मानिन्छ ।

आगामी २८ चैतमा हुने महासङ्घको महासभा तथा अधिवेशनबाट उपाध्यक्ष चयन हुने व्यक्तिले अर्को कार्यकाल (सन् २०२६–२९) को नेतृत्व चयन गर्नेछ ।

श्रेष्ठले आगामी कार्यकाल ढकाल नेतृत्वको महासङ्घलाई सफल बनाउने र अर्को कार्यकालमा आफ्ना कार्य योजना कार्यान्वयन गर्ने बताउँदै आएका छन् ।

महासंघमा हालका वस्तुगततर्फको उपाध्यक्ष अञ्जन श्रेष्ठ, उद्योगतर्फका उपाध्यक्ष दिनेश श्रेष्ठ, एशोसिएटतर्फका उपाध्यक्ष रामचन्द्र संघाईले पनि वरिष्ठ उपाध्यक्ष पदमा उम्मेवारी दिने बताउँदै आएका छन् ।