काठमाडौँ । व्यवसायी दुर्गा प्रसाईंले ३२ खर्ब रुपैयाँ देशबाट पलायन भएको दाबी गरेका छन् ।
शनिवार काठमाडौँको पेरिसडाँडामा पत्रकार सम्मेलन गरी उनले नेताहरुले देश बेचेर पैसा दुबईलगायत विभिन्न मुलुकमा राखेको दाबी गरे ।

उनले नेताहरुले भ्रष्टाचार गरेर ३२ खर्ब रुपैयाँ भन्दा धेरै विदेशमा राखेको जिकिर गरे ।
उनले भने ‘३३ किलो सुनको पैसा दुबईको यो कम्पनीमा पेमेण्ट भएको छ । लिगल्ली रूपमा पेमेण्ट भएको छ । एस्कोडा ट्रेडिङ कन्सर्न भन्ने कम्पनीमा पेमेण्ट भएको छ । ग्यालेक्सी कम्पनी भन्ने हङकङमा छ एउटा त्यसको एडभान्स रेमिटेन्स भन्ने शाखा नेपालमा छ । ३२ खर्ब रुपैयाँ यो देशबाट पलायन भएको छ । ’

उनले नेपालमा चाँडै अमेरिकी सेना आउन लागेको पनि बताए ।
‘दुर्गा प्रसाईं सय कदम अघि रहेछ नि त यी राजनीतिज्ञभन्दा यहाँ अब अमेरिकी सेना छिटै आउँदैछन् ।’ उनले भने ।
आफूले यसअघि नै उठाएको एजेण्डालाई एमालले अहिले उठाएको उनको तर्क छ । ‘ मैले जुन माग राखेँ नि अहिले एमालेले पनि त्यही माग राख्यो होइन, संघीयता खारेज गर्नुपर्छ भन्ने ।’

उनले नक्कली शरणार्थी प्रकरणमा सबै दलका नेताहरु संलग्न रहेको दाबी गरे । नेपाली कांग्रसका महामन्त्री गगन थापाले नक्कली शरणार्थी प्रकरणमा खुलेर अभिव्यक्ति नराखेको भन्दै प्रसाईँले थापाको समेत सो प्रकरणमा संलग्नता हुन सक्ने आशंका गरे ।

उनले भने ‘भुटानी शरणार्थी भनेर चीनका जनतालाई पनि पठाएको छ अब अमेरिकाले यीनलाई छोड्छ त ? त्यही कारण यो विषय उठेको हो ? यो विषयमा गगन थापा किन चुप हुनुन्छ ? त्यहाँ पनि रहस्यको कुरा छ । यसमा सबै दलका नेताहरु मिलेका छन् । संसदमा भएका दलका टाउकेहरू सबै मिलेर भाग लगाएर खाएका छन् ।’