काठमाडौं । उपराष्ट्रपति रामशहाय यादवले, नेपालको आर्थिक विकासका लागि वैदेशिक लगानी आवश्यक रहेको बताएका छन् ।

अवैतनीक कन्सुलर कोर नेपालको १४ औं वार्षिक साधारण सभामा उनले जलविद्युत, पर्यटन लगायतका क्षेत्रमा विदेशी लगानी आर्कषित गरी मुलुकको आर्थिक विकास र समृद्धिका लागि थप योगदान दिन आवश्यक रहेको बताए ।

उनले भने, ‘महत्वपूर्ण दौत्य राष्ट्रहरुका नागरिकलाई नेपालमा पर्यटकका रुपमा भित्राउन यो संस्थाको महत्वपूर्ण भूमिका रहेको छ । नेपालमा लगानीका सम्भावना रहेका क्षेत्रहरु जलविद्युत, पर्यटन लगायतमा विदेशी लगानी आकर्षित गरी मुलुकको आर्थिक विकास र समृद्धिका लागि संस्थाले थप योगदान दिन सक्नु पर्छ ।

नेपालमा जलवायु परिवर्तनका कारण सिर्जित समस्याको न्यूनिकरण गर्नमा सम्बन्धित राष्ट्रहरुसँग पहल गर्न उनको आग्रह छ ।

 

उनले आर्थिक समृद्धिको लागि मैत्री सम्बन्ध स्थापित भएका सबै राष्ट्रहरुसँग सुमधुर र शान्तिपूर्ण सम्बन्ध राख्नु आजको आवश्यकता भएको भन्दै उक्त कार्यलाई संस्थाको पूर्ण सहयोगको अपेक्षा गरेको पनि बताए ।

उनले भने, ‘संस्थाले नेपालको प्रतिष्ठालाई उच्च बनाउन र नेपाल तथा मित्र राष्ट्र आम जनबीचको सामिप्यता अभिवृद्धि गर्दै, दौत्य सम्बन्धलाई थप मजबुद बनाउने कार्यमा अझ सबल रहने विश्वास लिएको छु ।

आर्थिक समृद्धिको यात्रामा अग्रसर रहेको नेपालको लागि मैत्री सम्बन्ध स्थापित भएका सबै राष्ट्रहरुसँग सुमधुर र शान्तिपूर्ण सम्बन्ध बनाई राख्नु आजको आवश्यकता हो । यो कार्यलाई यो संस्थाको पूर्ण सहयोगको अपेक्षा गरेको छु ।’

उनले नेपालको दौत्य सम्बन्ध रहेका तर आवासिय दूतावास नभएका ५९ देशको प्रतिनिधित्व गर्दै ती देश र नेपाल बीचको आर्थिक, व्यापारिक र सांस्कृतिक सम्बन्धलाई प्रगाढ बनाउन संस्थाबाट हुने गरेको सहयोग र योगदान प्रशंसनिय रहेको उल्लेख गरेका छन् ।