काठमाडौं । सरकारले शुरु गरेको योगदानमा आधारित सामाजिक सुरक्षा कार्यक्रम अन्र्तगत अनौपचारिक र स्वरोजगार क्षेत्रका श्रमिकलाई सामाजिक सुरक्षा कोषमा आबद्ध गर्ने क्रममा लुम्बिनी प्रदेश अन्र्तगत कपिलवस्तु जिल्लाका ७ स्थानिय तह सामाजिक सुरक्षा कोषमा आबद्ध भएका छन् ।

चैत्र १ गते कपिलवस्तुको तौलिहवामा सम्पन्न भएको स्थानिय तहसंगको १ दिने कार्यशाला गोष्ठी कार्यक्रमका दौरान कोष र ७ स्थानिय निकायका प्रतिनिधिवीच उक्त सम्झौता पत्रमा हस्ताक्षर भएको हो । आबद्ध हुने स्थानिय तहहरुमा वाणगगा नगरपालिका, बुद्धभुमी नगरपालिका , शिवराज नगरपालिका , कपिलवस्तु नगरपालिका , यशोधरा गाउपालीका , विजयनगर गाउपालिका र शुद्दोधन गाउपालिका रहेका छन् ।

सो अवसरमा कार्यक्रमका प्रमुख अतिथी लुम्बिनी प्रदेश सभा सदस्य विष्णु पन्थीले सामाजिक सुरक्षा योजना कपिलवस्तुका सबै गाँउपालीकामा लागु गरिए मुलुकको समृद्धिमा महत्वपुर्ण योगदान रहने बताउनुभयो । साथै समाजवादी मार्गमा हिडाउने अभियानमा कपिलवस्तुका स्थानिय सरकारबाट अग्रसरता लिएको समेत उहाँले दाबी गर्नुभयो ।

सो अवसरमा बोल्नुहुदै बुद्धभुमी नगरपालिकाका प्रमुख केशव कुमार श्रेष्ठले जहाँ असुरक्षा हुन्छ ,त्यहाँनै सामाजिक सुरक्षाको बलियो उपस्थिति रहनु पर्ने बताउनु भयो ।

बाणगंगाा नगरपालिकाका प्रमुख चक्रपाणी अर्यालले अनौपचारिक क्षेत्रका श्रमिकको लागि कोषका कार्यक्रम निकै नै उपयोगी हुने देखेपछि आफ्नो नगरपालिकाले कोषमा आबद्ध हुने विषयमा सम्झौता गरेको बताउनुभयो ।

कोषका उपकार्यकारी निर्देशक पन्थीले सामाजिक सुरक्षा कोषले जुनसुकै अवश्थामा पनि आयको निरन्तरताको परिकल्पना गरेको बताउनुहुदै कोषको योजनामा सहभागी भई कपिलवस्तुका स्थानिय तहले देखाएको तत्परता सराहनिय रहेको उल्लेख गर्नुभयो । कोष सञ्चालन गर्ने योजनाका बारेमा स्थानिय तहहरुले देखाएको तत्परताले उत्साह थपेको समेत उहाँले बताउनुभयो ।

सो अवसरमा कोषका वरिष्ठ सहायक निर्देशक केदार ज्ञवालीले कार्यपत्र प्रस्तुत गर्दै सामाजिक सुरक्षा कोषका विभिन्न योजनाका बारेमा जानकारी दिनुभयो । कार्यक्रममा बोल्नुहुदै कोषका बुटवल शाखा प्रमुख खिम कार्कीले कपिलवस्तुका स्थानिय तहको कोषमा आबद्धतासंगै यसले देशभरमा स्थानिय तह कोषमा आबद्ध हुने सवालमा अझ सकारात्मक सन्देश प्रवाह गरेको बताउनुभयो ।