काठमाडौं । अप्पर मर्स्याङ्दी हाइड्रोपावर कम्पनीले मर्स्याङ्दी नदीमा १०२ मेगावाट क्षमताको अप्पर मर्स्याङ्दी-१ जलविद्युत आयोजना निर्माण गर्न लक्ष्मी सन्राईज बैंकको नेतृत्वमा सहवित्तियकरण सम्झौता सम्पन्न गरेको छ।

कुल लागत रू २१.४० अर्ब रहेको यस आयोजनामा ७४.७७ प्रतिशत बैंकहरूको लगानी र बाँकी २५.२३ प्रतिशत कम्पनीका प्रवर्द्धक तथा संस्थापकको लगानी हुनेछ। लक्ष्मी सन्राईज बैंकले ७ अर्बको टर्म लोन प्रदान गर्नेछ भने सह–अगुवा ग्लोबल आइएमई बैंकले ६ अर्ब र प्रभु बैंकले ३ अर्ब लगानी गर्नेछन्।

यस परियोजनाले वार्षिक ५८३.०३ गिगावाट आवर विद्युत उत्पादन गर्नेछ, जसले नेपालको ऊर्जा आपूर्तिमा महत्वपूर्ण योगदान पुर्याउने विश्वास गरिएको छ। निर्माण कार्य २०२९ सम्म सम्पन्न गर्ने लक्ष्य राखिएको छ।

अप्पर मर्स्याङ्दी हाइड्रोपावर-१ लाई के.सी. ग्रुप र क्याल ग्रुपले प्रवर्द्धन गरेका हुन्। परियोजनाका लागि कम्पनीले २०७५ साल पौष १० मा विद्युत उत्पादनको अनुमति प्राप्त गरेको थियो भने पौष ९, २०८१ मा नेपाल विद्युत प्राधिकरणसँग खरिद–बिक्री सम्झौता गरेको छ।

यो सम्झौताले नेपालको नवीकरणीय ऊर्जा क्षेत्रमा ठूलो फड्को मार्ने अपेक्षा गरिएको छ।