काठमाडौं । नागरिक लगानी कोष र भूमि व्यवस्थापन तथा अभिलेख विभागबीच धितो रोक्का तथा फुकुवासम्बन्धी प्रक्रिया अब अनलाइन प्रणालीमार्फत हुने गरी सम्झौता सम्पन्न भएको छ।

सम्झौतापत्रमा कोषका कार्यकारी निर्देशक पर्वत कुमार कार्की र विभागका महानिर्देशक शिवप्रसाद रेग्मीले हस्ताक्षर गरेका हुन्।

सम्झौतापछि अब काठमाडौं उपत्यकामा कोषले प्रदान गर्ने आवास कर्जा तथा सरल कर्जाका लागि आवश्यक धितो रोक्का र फुकुवा प्रक्रिया पूर्णरूपमा अनलाइन प्रणालीबाट सञ्चालन हुने भएको छ।

यस कदमबाट सेवा प्रक्रियामा पारदर्शिता, गति र प्रभावकारिता आउने विश्वास लिइएको छ। कोषले सेवाग्राहीलाई छिटो छरितो र सहज सेवा प्रदान गर्न सकिने भन्दै अनलाइन प्रणालीले वित्तीय सेवा प्रवाहलाई अझ सरल बनाउने अपेक्षा गरेको छ।