काठमाडौं । गोलछा ग्रुप प्रस्तुत ग्लोकल टीन हिरो २०२५ का आयोजक ग्लोकल प्रा.लि. ले यस वर्षका ग्लोकल २० अन्डर २० का सम्मानित व्यक्तिहरूको सूची सार्वजनिक गरेको छ ।

१३ देखि १९ वर्षका किशोरकिशोरीहरूको असाधारण प्रतिभा र नेतृत्व क्षमता प्रदर्शन गर्ने उत्कृष्ट आवेदकहरूबाट चयन गरिएको २० अन्डर २० सूचीमा प्रविधि, सामाजिक सक्रियता, उद्यमशीलता, वातावरणवाद, कला र स्वास्थ्य जस्ता विभिन्न क्षेत्रमा महत्वपूर्ण काम गरेका युवाहरू समावेश छन् ।

ग्लोकल टीन हिरोको ११औं संस्करण अन्तर्गत यो सूची सार्वजनिक गरिएको कम्पनीले जनाएको छ ।

ग्लोकल २० अन्डर २० २०२५ का लागि ७८६ आवेदनहरूको विस्तृत समीक्षा गरेर २० युवालाई समाजमा सकारात्मक परिवर्तन ल्याउने श्रेणीमा सम्मानित गरिएको छ ।

सूचीमा सामेल व्यक्तिहरूले आफ्नो शैक्षिक कार्यभन्दा बाहिर गएर समाजको उत्थानमा योगदान पुर्याएका छन् । यस कार्यक्रमको मुख्य उद्देश्य भनेको किशोर किशोरीहरूलाई प्रोत्साहित गर्दै उनीहरूको उत्कृष्ट कार्यलाई चिनाउने र आवश्यक सामाजिक बदलाव ल्याउनु हो ।

ग्लोकल टीन हिरो २०२५ को पुरस्कार वितरण समारोह सेप्टेम्बर १, २०२५ मा हुनेछ, जहाँ विजेताहरू र श्रेष्ठ ६ फाइनलिस्टहरू सार्वजनिक गरिने बताइएको छ ।

ग्लोकल टीन हिरोका साझेदार संस्थाहरूमा कोका–कोला, हिमालयन टिभी एचडी, ग्लोबल आइएमई बैंक, पञ्चकन्या ग्रुप, एति एयरलाइन्स र नेपाल पर्यटन बोर्ड सहित अन्य प्रतिष्ठानहरू रहेका छन् ।

अगामी कार्यक्रम र सम्मानित व्यक्तिहरूको बारेमा थप जानकारीका लागि ग्लोकल टीन हिरो वेबसाइट https://glocalteenhero.com/20under20-2025/ मा जान सकिन्छ ।