काठमाडौं । एनएमबि बैंक लिमिटेडको नेतृत्वमा कालीकोट जिल्लामा निर्माण हुन लागेको ४४० मेगावाट क्षमताको तिला–१ जलविद्युत आयोजनाको वित्तीय व्यवस्थापन सम्पन्न भएको छ। आयोजनाको कुल अनुमानित लागत ५९ अर्ब ४० करोड रुपैयाँ रहेकोमा बैंक तथा वित्तीय संस्थाहरूले ४४ अर्ब ५५ करोड रुपैयाँ ऋण लगानी गर्ने भएका छन्।

कालीकोट जिल्लाको तिला खोलामा एस.सी. पावर कम्पनी प्रालिले निर्माण गर्न लागेको उक्त आयोजनाको वित्तीय व्यवस्थापनमा एनएमबि बैंक अगुवा बैंक (लिड बैंक) का रूपमा रहेको छ। ग्लोबल आइएमई बैंक, हिमालयन बैंक तथा प्रभु बैंक सह–अगुवा बैंकका रूपमा सहभागी छन् भने अन्य विभिन्न बैंक तथा वित्तीय संस्थाहरू सदस्य बैंक तथा वित्तीय संस्थाका रूपमा सहभागी हुनेछन्।

एस.सी. पावर कम्पनीको मुख्य नेतृत्व सुसन कर्माचार्य तथा उनको समूहले गरेको छ। आयोजनाको उत्पादन अनुमतिपत्रअनुसार जडित क्षमता ४४० मेगावाट रहेको छ भने विद्युत खरिद बिक्री सम्झौता (पीपीए) अनुसार आयोजनाले व्यावसायिक उत्पादन सुरु गर्नुपर्ने मिति विसं २०८७ पुस १५ गते अर्थात् ३१ डिसेम्बर २०३० तोकिएको छ।

वित्तीय व्यवस्थापनसम्बन्धी सम्झौतामा एनएमबि बैंकका तर्फबाट सहायक महाप्रबन्धक दिनेश दुलाल र कम्पनीका तर्फबाट अध्यक्ष सुसन कर्माचार्यले हस्ताक्षर गरेका हुन्।

निजी क्षेत्रको लगानी तथा नेतृत्वमा अगाडि बढाइएको तिला–१ जलविद्युत आयोजना जडित क्षमताका आधारमा हालसम्मकै ठूलो आयोजना रहेको बैंकले जनाएको छ। आयोजना निर्माण सम्पन्न भएपछि पहिलो वर्ष करिब ११ अर्ब ४० करोड रुपैयाँ आम्दानी हुने अनुमान गरिएको छ।

एनएमबि बैंकले नेपाल राष्ट्र बैंकद्वारा जारी वातावरणीय तथा सामाजिक जोखिम व्यवस्थापन (ईएसआरएम) सम्बन्धी निर्देशिकाअनुसार वातावरणीय तथा सामाजिक नीति तथा व्यवस्थापन प्रणाली कार्यान्वयन गर्दै आएको जनाएको छ। बैंकले लगानीका वातावरणीय तथा सामाजिक पक्षको मूल्याङ्कनका आधारमा जिम्मेवार तथा दिगो लगानीलाई प्राथमिकता दिँदै आएको छ।

अन्तर्राष्ट्रिय असल अभ्यासलाई अवलम्बन गर्ने क्रममा आयोजनाको प्रारम्भिक वातावरणीय, सामाजिक तथा सुशासन पक्षको समेत अध्ययन तथा मूल्याङ्कन गरिएको बैंकले जनाएको छ। बैंकका अनुसार आयोजनाको मूल्याङ्कनका लागि हाइड्रोपावर सस्टेनेबिलिटी एलायन्स (एचएसए) ले विकास गरेको ‘हाइड्रोपावर सस्टेनेबिलिटी टुल’ समेत प्रयोग गरिएको थियो।

एनएमबि बैंकले हालसम्म ५० भन्दा बढी जलविद्युत आयोजनामा लगानी गरिसकेको जनाएको छ। बैंकले देशभर रहेका १९७ शाखा, १७६ एटिएम तथा ९ एक्सटेन्सन काउन्टरमार्फत बैंकिङ सेवा प्रदान गर्दै आएको छ।