काठमाडौं। कामना सेवा विकास बैंकले आफ्नो १९औं वार्षिकोत्सवको अवसरमा आयोजना गरेको “कामना सेवा फुट्सल कप सिजन ५” शनिबार सम्पन्न भएको छ।

पुरुषतर्फको फाइनल खेलमा सिद्धार्थ बैंकले प्राइम कमर्सियल बैंकलाई २–० गोल अन्तरले पराजित गर्दै उपाधि हात पारेको छ। सोही क्रममा महिलातर्फको फाइनल खेलमा लुम्बिनी विकास बैंकले ग्लोबल आइएमई बैंकलाई १–० ले हराउँदै लगातार दोस्रो पटक उपाधि जितेको छ।

विजेता र उपविजेता टोलीलाई बैंकको तर्फबाट ट्रफी, मेडल र प्रमाणपत्र प्रदान गरिएको थियो। प्रतियोगिताको उद्घाटन बैंकका डी.सी.ई.ओ. विनय दाहालले एन्फा रेफ्री अञ्जना सुनुवारलाई बल हस्तान्तरण गरी गर्नुभएको थियो भने समापन समारोहमा प्रमुख सञ्चालन अधिकृत विकास ढुङ्गानाले पुरस्कार वितरण गर्नुभएको थियो।

प्रतियोगितामा पुरुषतर्फ १७ टिम र महिलातर्फ ९ टिमले सहभागिता जनाएका थिए। कार्यक्रममा बैंकका विभिन्न विभागीय प्रमुख तथा कर्मचारीहरूको उपस्थिति रहेको थियो। बैंकले आफ्नो १९औं वार्षिकोत्सवको अवसरमा आगामी कात्तिक २७ गते (बिहिबार) देशभर रक्तदान कार्यक्रम आयोजना गर्ने पनि जनाएको छ।