काठमाडौं ।आज डिल्लीबजार, काठमाडौंमा सिटिजन्स क्यापिटल लिमिटेड र होटल पार्क ल्याण्ड लिमिटेडबीच साधारण शेयर निष्काशन तथा बिक्री प्रबन्धक नियुक्ति सम्बन्धी सम्झौता सम्पन्न भएको छ। सम्झौतामा होटल पार्क ल्याण्डका अध्यक्ष श्री शरद कुमार पाण्डे र सिटिजन्स क्यापिटलका प्रमुख कार्यकारी अधिकृत श्री सबिर बादे श्रेष्ठले हस्ताक्षर गर्नुभयो।

सम्झौता अनुसार सिटिजन्स क्यापिटल लिमिटेडले नेपाल धितोपत्र बोर्डको स्वीकृति पश्चात होटल पार्क ल्याण्ड लिमिटेडको सार्वजनिक निष्काशनका लागि बिक्री प्रबन्धकको भूमिका निर्वाह गर्नेछ।

चितवनको सौराहमा ३२ कट्ठा क्षेत्रफलमा रहेको होटल पार्क ल्याण्डमा हाल ३२ कोठा सञ्चालनमा छन्। होटल सौराहा गैडाचोकबाट ३५० मिटरको दूरीमा रहेको छ। कम्पनीले आगामी दिनमा क्षमता बृद्धि गर्दै ४४ कट्ठामा १०५ कोठा सहित चार तारे होटल बनाउने लक्ष्य राखेको छ।