काठमाडौँ। इलेक्ट्रिक स्कुटर सहरभित्र मात्र उपयुक्त हुन्छ भन्ने आम धारणा तोड्दै भारतको गोवाबाट नेपालसम्म Ather 450 इलेक्ट्रिक स्कुटरमा ६,००० किलोमिटरभन्दा लामो क्रस–कन्ट्री यात्रा सफलतापूर्वक सम्पन्न गरिएको छ।

भारतका दुई राइडरहरूले गोवाबाट यात्रा सुरु गरी गोरखपुर हुँदै बुटवल, चितवन र काठमाडौँसम्मको दूरी तय गरेका हुन्। आगमन–प्रस्थानसहित ६,००० किलोमिटरभन्दा बढी दूरी समेटिएको यस यात्रालाई Asia Book of Records मा दर्ता गर्ने तयारी गरिएको जनाइएको छ।

यस यात्रामार्फत एक व्यक्तिद्वारा सम्पन्न गरिएको सबैभन्दा लामो इलेक्ट्रिक स्कुटर यात्रा तथा पहिलो पटक सम्पन्न भएको क्रस–कन्ट्री इलेक्ट्रिक स्कुटर यात्रा गरी दुई महत्वपूर्ण कीर्तिमान स्थापना गर्ने लक्ष्य राखिएको छ।

९ जनवरीमा सुरु भएको यात्राका क्रममा राइडरहरूले विभिन्न भू–भाग, लामो राजमार्ग, अन्तरदेशीय सीमा तथा वास्तविक चार्जिङ अवस्थाहरूको सामना गरे। यात्राले इलेक्ट्रिक सवारी प्रयोगकर्ताहरूमा देखिने रेन्ज एङ्जायटी र चार्जिङ एङ्जायटी सम्बन्धी चिन्तालाई प्रत्यक्ष अनुभवमार्फत कम गर्न सहयोग पुगेको बताइएको छ।

Ather 450 को बलियो प्लेटफर्म र विस्तार हुँदै गएको चार्जिङ इकोसिस्टमको आधारमा सम्पन्न यस यात्राले लामो दूरीमा पनि इलेक्ट्रिक स्कुटर भरपर्दो र विश्वसनीय हुन सक्ने सन्देश दिएको कम्पनीको भनाइ छ।

यात्राका क्रममा स्कुटर १७ जनवरीमा बुटवल, १८ जनवरीमा चितवन र १९ जनवरीमा काठमाडौँ पुगेको थियो। सो अवसरमा सम्बन्धित Ather Experience Center हरूमा EV तथा प्रविधि उत्साहीहरूसँग Meet & Greet कार्यक्रमसमेत आयोजना गरिएको थियो।

भारतमा डिजाइन, इन्जिनियरिङ तथा निर्माण गरिएको Ather 450 ले विभिन्न सडक र मौसम पार गर्दै इलेक्ट्रिक मोबिलिटीप्रतिको विश्वास अझ बलियो बनाएको कम्पनीले जनाएको छ।