काठमाडौँ, माघ १२ — नेपालको अग्रणी डिजिटल भुक्तानी सेवा प्रदायक कम्पनी इसेवा ले स्थापना तथा सेवा सञ्चालनको १७ औँ वर्षमा प्रवेश गरेको छ। सन् २००९ मा बेटा संस्करण सार्वजनिक गरी २०१० जनवरी २५ बाट औपचारिक सेवा सुरु गरेको इसेवाले डिजिटल भुक्तानीदेखि डिजिटल अर्थतन्त्र विस्तारसम्म १६ वर्षको यात्रा पूरा गर्दै १७ औँ वर्षमा प्रवेश गरेको हो।

‘सबै, सधैं, सँगै’ भन्ने मूल नाराका साथ सेवा प्रदान गर्दै आएको इसेवाले हाल टपअप, युटिलिटी बिल भुक्तानी, फ्लाइट टिकट, होटल बुकिङ, बिमा खरिद, मुभी टिकट, कर्जा, लगानी लगायतका सेवाहरू प्रदान गर्दै आएको छ। कम्पनीले डिजिटल वित्तीय सेवाहरूलाई सरल, सुरक्षित र सबैका लागि पहुँचयोग्य बनाउने उद्देश्यका साथ निरन्तर नवप्रवर्तन गरिरहेको जनाएको छ।

१७ औँ वार्षिकोत्सव तथा इन्नोभेसन डे कार्यक्रमलाई सम्बोधन गर्दै इसेवाका अध्यक्ष पर्शुराम कुँवर क्षेत्रीले डिजिटल भुक्तानी सेवाहरूलाई अझ उत्कृष्ट, सुरक्षित र भरपर्दो बनाउन कम्पनी प्रतिबद्ध रहेको बताउनुभयो। उहाँले नियामक निकाय, प्रयोगकर्ता र सरोकारवालाहरूसँग सहकार्य गर्दै डिजिटल वित्तीय सेवाको विस्तारमार्फत समाजमा सकारात्मक योगदान दिने प्रतिबद्धता व्यक्त गर्नुभयो।

यस्तै, प्रमुख कार्यकारी अधिकृत जगदीश खड्काले इसेवाले सबैलाई समेट्दै सँगै अगाडि बढ्ने उद्देश्यका साथ सेवा प्रदान गर्दै आएको बताउँदै नेपालको कम्पनी पनि विश्वस्तरमा प्रतिस्पर्धा गर्न सक्षम रहेको उल्लेख गर्नुभयो। प्रयोगकर्ताका आवश्यकता र प्रविधिको विकासलाई केन्द्रमा राख्दै निरन्तर नवप्रवर्तनमा लागिरहेको उहाँको भनाइ थियो।

तीन नयाँ सुविधा सार्वजनिक

१७ औँ वार्षिकोत्सवको अवसरमा इसेवाले तीन नयाँ प्रयोगकर्ता–केन्द्रित सुविधा सार्वजनिक गरेको छ।

टाकब्याक सुविधा दृष्टिविहीन तथा कम दृष्टि भएका प्रयोगकर्ताका लागि ल्याइएको हो, जसले स्क्रिनमा देखिएको सामग्रीलाई आवाजमा रूपान्तरण गर्छ। नेपाली र अङ्ग्रेजी दुवै भाषामा उपलब्ध यो सुविधा नेपालमा डिजिटल वित्तीय समावेशिता बढाउने उद्देश्यले सुरु गरिएको कम्पनीले जनाएको छ।

इन्टेन्ट–बेस्ड पेमेन्ट प्रणालीमार्फत प्रयोगकर्ताले जहाँ भुक्तानी गर्नुपर्ने हुन्छ, त्यहीँबाटै सिधै भुक्तानी प्रक्रिया सुरु गर्न सक्नेछन्। फिङ्गरप्रिन्ट वा फेस आईडीबाट प्रमाणीकरण हुने भएकाले एमपिन, पासवर्ड वा ओटीपीको झन्झट घट्ने र भुक्तानी प्रक्रिया छिटो हुने अपेक्षा गरिएको छ।

इसेवा सर्कल च्याट सुविधाबाट प्रयोगकर्ताले साथी थप्ने, समूह बनाउने, बिल बाँडफाँड गर्ने, उपहार पठाउने तथा समूह च्याट गर्ने सुविधा पाउनेछन्। यसले सामाजिक संवाद र वित्तीय लेनदेनलाई एउटै प्लेटफर्ममा सहज बनाउने कम्पनीको विश्वास छ।

इसेवाले प्रयोगकर्ता केन्द्रित नवप्रवर्तनमार्फत डिजिटल अर्थतन्त्रमा सबै वर्गको सहभागिता बढाउने र डिजिटल नेपाल निर्माणमा योगदान पुर्‍याउने प्रतिबद्धता जनाएको छ।