काठमाडौँ । लक्ष्मी सनराइज बैंक लिमिटेडले चालू आर्थिक वर्ष २०८२/८३ को दोस्रो त्रैमाससम्मको वित्तीय विवरण सार्वजनिक गरेको छ। सार्वजनिक विवरणअनुसार बैंकको खुद नाफा ऋणात्मक रहेको छ।

बैंकले चालू आर्थिक वर्षको पुस मसान्तसम्म २७ करोड ३६ लाख रुपैयाँ खुद नोक्सानी व्यहोरेको छ। गत आर्थिक वर्षको सोही अवधिमा बैंकले १ अर्ब १६ करोड २० लाख रुपैयाँ खुद नाफा कमाएको थियो। खुद ब्याज आम्दानीमा सामान्य सुधार भए पनि इम्पेरमेन्ट चार्ज उल्लेख्य बढ्दा नाफा प्रभावित भएको बैंकले जनाएको छ।

छ महिनाको अवधिमा बैंकको खुद ब्याज आम्दानी १ प्रतिशतले बढेर ५ अर्ब २४ करोड ९० लाख रुपैयाँ पुगेको छ। गत आर्थिक वर्षको सोही अवधिमा बैंकको खुद ब्याज आम्दानी ५ अर्ब १९ करोड रुपैयाँ रहेको थियो।

यस अवधिमा बैंकको सञ्चालन आम्दानी पनि ऋणात्मक बनेको छ। गत आर्थिक वर्षको सोही अवधिमा १ अर्ब १६ करोड २० लाख रुपैयाँ सञ्चालन आम्दानी रहेको बैंकको सञ्चालन आम्दानी चालू आवमा घटेर १५ करोड ९८ लाख रुपैयाँ ऋणात्मक भएको छ।

समीक्षा अवधिमा बैंकको खुद फी तथा कमिशन आम्दानी १८.१५ प्रतिशतले बढेर १ अर्ब १८ करोड रुपैयाँ पुगेको छ। इम्पेरमेन्ट चार्ज भने १ अर्ब ७९ करोड ३० लाख रुपैयाँबाट बढेर ४ अर्ब ४७ करोड ३० लाख रुपैयाँ पुगेको छ, जसले नाफामा ठूलो दबाब सिर्जना गरेको छ।

पुस मसान्तसम्म बैंकको चुक्ता पूँजी १० प्रतिशतले बढेर २६ अर्ब ७८ करोड रुपैयाँ पुगेको छ भने जगेडा कोषमा १७ अर्ब ७३ करोड रुपैयाँ सञ्चिति रहेको छ। बैंकको वितरणयोग्य मुनाफा ८४ करोड २७ लाख रुपैयाँ ऋणात्मक रहेको छ।

बैंकको खराब कर्जा अनुपात (एनपीएल) ५.६७ प्रतिशतबाट घटेर ५.५० प्रतिशतमा झरेको छ। प्रतिशेयर आम्दानी (EPS) २.४ रुपैयाँ ऋणात्मक रहेको छ भने प्रतिशेयर नेटवर्थ १६६ रुपैयाँ २३ पैसा रहेको छ।