काठमाडौं । कामना सेवा विकास बैंकले वि.सं. २०८३ सालको वार्षिक क्यालेन्डर सार्वजनिक गरेको छ। बैंकले आधुनिक प्रविधिलाई ध्यानमा राख्दै उक्त क्यालेन्डर डिजिटल माध्यमबाट उपलब्ध गराएको जनाएको छ।

नेपाल पंचाङ्ग निर्णायक विकास समितिबाट स्वीकृत प्राप्त क्यालेन्डरमा समितिले निर्धारण गरेका विभिन्न तिथि, पर्व तथा शुभ मुहूर्तहरू समावेश गरिएको बैंकले जनाएको छ। यसले सर्वसाधारणलाई धार्मिक तथा सांस्कृतिक कार्यहरूका लागि आवश्यक जानकारी उपलब्ध गराउने विश्वास बैंकले लिएको छ।

बैंकका अनुसार डिजिटल क्यालेन्डर सहज रूपमा प्राप्त गर्नका लागि क्यूआर कोड पनि सार्वजनिक गरिएको छ। उक्त क्यूआर कोड स्क्यान गरी बैंकका ग्राहक तथा सर्वसाधारणले २०८३ सालको क्यालेन्डर हेर्न तथा डाउनलोड गर्न सक्नेछन्।

बैंकले सो क्यूआर कोड आफ्नो आधिकारिक सामाजिक सञ्जाल तथा वेबसाइटमार्फत सार्वजनिक गरेको जनाएको छ।