काठमाडौँ । कर्मचारी सञ्चय कोष र राष्ट्रिय परिचयपत्र तथा पञ्जीकरण विभाग बीच राष्ट्रिय परिचय व्यवस्थापन प्रणालीको विद्युतीय सेवा प्रयोगसम्बन्धी सम्झौता भएको छ ।

कोषको सेवा प्रवाहलाई थप सहज, प्रभावकारी तथा प्रविधिमैत्री बनाउने उद्देश्यले गरिएको उक्त सम्झौतामा विभागका महानिर्देशक नमराज घिमिरे र कोषका प्रशासक जितेन्द्र धितालले काठमाडौँमा हस्ताक्षर गरेका हुन् ।

सम्झौतापछि कोषमा आबद्ध हुने तथा भइसकेका सञ्चयकर्ताहरूको पहिचान प्रमाणीकरण राष्ट्रिय परिचयपत्र व्यवस्थापन सूचना प्रणालीमार्फत हुने व्यवस्था सुनिश्चित भएको छ । यसले प्रमाणीकरणका लागि कोषमा भौतिक रूपमा उपस्थित हुनुपर्ने झन्झट हटाउने विश्वास गरिएको छ ।

यसैगरी, कोषको सेवा प्रणालीलाई पूर्ण रूपमा डिजिटल माध्यममा रूपान्तरण गर्न, सेवा प्रवाहलाई छिटो, सहज, भरपर्दो तथा पारदर्शी बनाउन सम्झौताले महत्वपूर्ण योगदान पुर्‍याउने अपेक्षा गरिएको छ । साथै, यसबाट सेवाग्राहीको समय बचत हुनुका साथै कारोबारलाई थप सुरक्षित बनाउने लक्ष्य राखिएको छ ।

सम्झौताअनुसार सञ्चयकर्ताको जनसाङ्ख्यिक विवरण राष्ट्रिय परिचय व्यवस्थापन सूचना प्रणालीसँग एकीकृत गरी सुरक्षित रूपमा डाटा आदान–प्रदान गर्ने प्राविधिक संरचना विकास गरिनेछ ।

कार्यक्रममा विभागका महानिर्देशक नमराज घिमिरेले आधुनिक प्रविधिको प्रयोगमार्फत सार्वजनिक सेवा सुधार, नागरिकमैत्री शासन प्रणाली निर्माण तथा डिजिटल नेपाल अभियानमा टेवा पुग्ने विश्वास व्यक्त गरे । यस्तै, कोषका प्रशासक जितेन्द्र धितालले सूचना प्रणाली एकीकरणले सेवा प्रवाहमा दोहोरोपना हटाउने, लागत घटाउने र कार्यक्षमता बढाउने बताए ।

कर्मचारी सञ्चय कोषले आगामी दिनमा आधुनिक प्रविधि र पारदर्शी व्यवस्थापनमार्फत सेवाग्राहीलाई अझ गुणस्तरीय र झन्झटमुक्त सेवा प्रदान गर्ने प्रतिबद्धता जनाएको छ ।