काठमाडौं। नेपाल टेलिकम को मोबाइल डाटा तथा एफटीटीएच (FTTH) इन्टरनेट सेवा आज दिउँसो केही समयका लागि अवरुद्ध भएको छ। यसले काठमाडौं उपत्यका लगायत देशका विभिन्न स्थानका प्रयोगकर्तालाई असर पारेको थियो।

कम्पनीका अनुसार जावलाखेलस्थित कोर राउटरमा आएको प्राविधिक समस्याका कारण सेवा अचानक बन्द भएको हो। उक्त समस्याका कारण इन्टरनेट प्रयोगकर्ताले असुविधा भोग्नुपरेको थियो।

नेपाल टेलिकमले एक प्रेस विज्ञप्ति जारी गर्दै ग्राहकवर्गमा पर्न गएको असुविधाप्रति क्षमायाचना गरेको छ। कम्पनीले प्राविधिक टोलीमार्फत समस्या समाधान गरिसकेको र सेवा पुनः पूर्ण रूपमा सञ्चालनमा आइसकेको जानकारी दिएको छ।

कम्पनीले भविष्यमा यस्ता समस्या दोहोरिन नदिने तथा सेवा अझ गुणस्तरीय बनाउने प्रतिबद्धता समेत व्यक्त गरेको छ।