काठमाडौं । होटल व्यवसायी महासंघ नेपाल (HPFN) ले सामाजिक उत्तरदायित्व बहन गर्ने आफ्नो प्रतिबद्धता दोहोर्‍याउँदै सरकारसँग सहकार्य गर्न पूर्ण रूपमा तयार रहेको जनाएको छ।

महासंघले आज जारी गरेको विज्ञप्तिमा काठमाडौंको थापाथली लगायत विभिन्न जोखिमयुक्त क्षेत्रबाट उद्धार गरिएका नागरिकहरूको सुरक्षित व्यवस्थापनमा सहयोग गर्न इच्छुक रहेको उल्लेख गरिएको छ। महासंघका अनुसार काठमाडौं उपत्यकाभित्र रहेका सदस्य होटलहरूमार्फत आवश्यक समन्वय गरी करिब १००० जनासम्म नागरिकलाई अस्थायी रूपमा सुरक्षित आश्रय (बसोबास) उपलब्ध गराउन सकिने व्यवस्था मिलाइएको छ।

उद्धार गरिएका व्यक्तिहरूको सम्मान, सुरक्षा तथा आधारभूत आवश्यकतालाई प्राथमिकतामा राख्दै व्यवस्थित आवास सुविधा प्रदान गर्ने स्पष्ट प्रतिबद्धता महासंघले जनाएको छ।

यस कार्यका लागि सम्बन्धित सरकारी निकायहरूसँग आवश्यक समन्वय, व्यवस्थापन तथा सहकार्य गर्न महासंघ पूर्ण रूपमा तत्पर रहेको पनि विज्ञप्तिमा उल्लेख छ।

महासंघका अध्यक्ष टी.आर. भण्डारी (शंकर) ले यस्तो मानवीय पहलमार्फत संकटको घडीमा नागरिकलाई राहत तथा सहयोग पुर्‍याउने उद्देश्य रहेको बताएका छन्।