काठमाडौँ — कुमारी बैंक लिमिटेडले नेपालमा डिजिटल बैंकिङलाई नयाँ उचाइमा पुर्‍याउने उद्देश्यले आइएमएस सफ्टवेयर प्रा. लि. सँगको सहकार्यमा नेपालकै पहिलो ‘इआरपी-एकीकृत रियल-टाइम डिजिटल कर्जा’ प्लेटफर्म सार्वजनिक गरेको छ।

कुमारी बैंकले आफ्ना व्यावसायिक ग्राहकहरूलाई यस नवीन पहलमार्फत आइएमएसको इआरपी सफ्टवेयरमार्फत बिनाधितो कर्जा प्रदान गर्नेछ, जसले गर्दा लामो कागजी प्रक्रिया तथा ग्राहकहरू शाखा धाउनुपर्ने झन्झट पूर्ण रूपमा हट्ने भएको छ। यस अत्याधुनिक प्लेटफर्मले कर्जा आवेदन, स्वीकृति, वितरण तथा भुक्तानीसम्मका सम्पूर्ण प्रक्रियाहरू डिजिटल माध्यमबाटै सम्पन्न गर्ने पूर्ण सुविधा प्रदान गर्दछ।

इआरपी प्रणालीसँगको प्रत्यक्ष एकीकरणमार्फत बैंकले व्यवसायहरूको बिक्री, दैनिक कारोबार तथा मौज्दात जस्ता वास्तविक समय (Real-time) को डाटाका आधारमा उनीहरूको कर्जा योग्यताको मूल्याङ्कन गर्न सक्नेछ। यो डाटामा आधारित प्रणालीले छिटो र सटीक निर्णय लिन सहयोग पुर्‍याउँदै परम्परागत धितोको आवश्यकता बिना नै व्यवसायहरूलाई सहज वित्तीय पहुँच उपलब्ध गराउनेछ।

यस अन्तर्गत इआरपी प्रणाली प्रयोग गर्ने व्यवसायहरूले आफ्नो कार्यसम्पादनका आधारमा अधिकतम रुपैयाँ ५०,००,००० सम्मको चालू पुँजी कर्जा (Working Capital Loan) प्राप्त गर्न सक्नेछन्, जसलाई १२ महिनासम्मको समान मासिक किस्ता (EMI) मार्फत भुक्तानी गर्न सकिने व्यवस्था रहेको छ। सेवाको प्रयोग, माग तथा नेपाल राष्ट्र बैंकको निर्देशनका आधारमा भविष्यमा कर्जाको सीमा वृद्धि गर्दै वित्तीय प्रक्रियालाई अझ सरल, छिटो र प्रभावकारी बनाउने योजना समेत बैंकले राखेको छ।

यो पहल नेपाल राष्ट्र बैंकको डिजिटल कर्जा सेवा विस्तार तथा कर्जामा पहुँच अभिवृद्धि गर्ने परिकल्पना अनुरूप नवप्रवर्तन र वित्तीय समावेशीकरणप्रति कुमारी बैंकको प्रतिबद्धताको प्रतिविम्ब हो, जसले विशेष गरी साना तथा मझौला उद्यमी (SMEs) हरूलाई प्रत्यक्ष रूपमा लाभान्वित गर्ने विश्वास गरिएको छ।

नेपालको अर्थतन्त्रमा महत्त्वपूर्ण योगदान पुर्‍याइरहेका १ लाखभन्दा बढी साना तथा मझौला उद्योगहरूलाई लक्षित गर्दै ल्याइएको यस कदमले वित्तीय समावेशीकरणलाई थप सुदृढ पार्ने अपेक्षा गरिएको छ। साथै, यसले उद्यमशीलताको प्रवर्द्धन, व्यवसाय विस्तार तथा समग्र आर्थिक गतिविधिमा सकारात्मक योगदान पुर्‍याउने विश्वास लिइएको छ।

देशव्यापी २८६ शाखा र ४१ एक्सटेन्सन काउन्टरहरूको सञ्जाल, सुदृढ बैंकिङ अनुभव तथा प्रविधि साझेदारहरूसँगको बलियो सहकार्यका कारण कुमारी बैंक नेपालमा डिजिटल वित्तीय रूपान्तरणको अग्रणी पङ्क्तिमा उभिन सफल भएको छ। यो नवीन पहलले साना तथा मझौला उद्यमीहरूको कर्जा पहुँचमा नयाँ मापदण्ड स्थापित गर्ने विश्वासका साथ बैंकले आगामी दिनहरूमा पनि अझ सरल, सुलभ र उत्कृष्ट सेवाका लागि निरन्तर सहकार्य गर्दै जाने प्रतिबद्धता व्यक्त गरेको छ।