काठमाडौं, नेपाल । नेपाली मिक्स्ड मार्शल आर्ट्स (एमएमए) खेलाडी कोशिश श्रेष्ठले भारतको प्रतिष्ठित इन्टरनेसनल फाइट लिग (आईएफएल) मा दिल्ली टिमको प्रतिनिधित्व गर्दै प्रतिस्पर्धा गर्ने भएका छन्। भारतको पहिलो फ्रेन्चाइजमा आधारित एमएमए प्रतियोगिताको रूपमा परिचित आईएफएल दक्षिण एशियामै तीव्र रूपमा लोकप्रिय बन्दै गएको कम्ब्याट स्पोर्ट्स प्लेटफर्म हो।

इन्डियन प्रिमियर लिग (आईपीएल), प्रो कबड्डी लिग र इन्डियन सुपर लिग (आईएसएल) जस्ता सफल फ्रेन्चाइज मोडेलहरूबाट प्रेरित भएर स्थापना भएको आईएफएलले विभिन्न शहरका टिमहरू मार्फत यस क्षेत्रका उत्कृष्ट फाइटरहरूलाई एउटै मञ्चमा ल्याएर एमएमए खेललाई व्यावसायिक र दिगो बनाउने उद्देश्यसहित नयाँ अवसरहरू सिर्जना गरिरहेको छ।

हाल १–० को व्यावसायिक एमएमए रेकर्ड कायम गरेका श्रेष्ठले दिल्ली टिमबाट रिङमा उत्रिँदा मुम्बई फ्रेन्चाइजका अनुभवी फाइटर प्रचण्ड जामिल्यासँग भिड्ने तय भएको छ, जसको एमेच्योर रेकर्ड १४–४ को निकै प्रभावशाली रहेको छ। दिल्ली र मुम्बईका यी दुई खेलाडीबीचको यो भिडन्तलाई यस प्रतियोगिताकै प्रमुख र सर्वाधिक प्रतिक्षित आकर्षणहरूमध्ये एकको रूपमा हेरिएको छ।

अन्तर्राष्ट्रिय फाइट लिगले छोटो समयमै महत्त्वपूर्ण उपलब्धि हासिल गर्दै आफ्ना प्रतियोगिताहरूलाई विश्वकै अग्रणी कम्ब्याट स्पोर्ट्स डिजिटल प्लेटफर्म ‘यूएफसी फाइट पास’ मार्फत विश्वभर प्रत्यक्ष प्रसारण गराउन सफल भइसकेको छ। लिगले सन् २०२६ भित्र ६ वटा ठूला प्रतियोगिताहरू आयोजना गर्ने महत्वकांक्षी लक्ष्य राखेको छ, जसले यस क्षेत्रको एमएमए खेललाई अन्तर्राष्ट्रिय स्तरमा नयाँ उचाइमा पुर्‍याउनेछ।

अन्तर्राष्ट्रिय खेल जगत्मा नेपाली खेलाडीहरूको पहिचान र गरिमा बढिरहेको वर्तमान सन्दर्भमा, दिल्ली फ्रेन्चाइजमा कोशिश श्रेष्ठको यो सहभागितालाई नेपालको लागि अर्को एउटा ठूलो उपलब्धिका रूपमा लिइएको छ। यस सहभागिताले व्यावसायिक कम्ब्याट स्पोर्ट्सको विश्वव्यापी मञ्चमा नेपाली प्रतिभाको बलियो उपस्थितिलाई प्रमाणित गर्नुका साथै नेपालले उच्च स्तरमा प्रतिस्पर्धा गर्न सक्ने योग्य खेलाडीहरू उत्पादन गर्न सक्छ भन्ने प्रचुर सम्भावनालाई पनि विश्वसामु उजागर गरेको छ।

समग्र दक्षिण एशियाभरी नै मिक्स्ड मार्शल आर्ट्सको लोकप्रियताको लहर चलिरहेका बेला आईएफएल जस्तो ठूलो प्रतियोगितामा कोशिश श्रेष्ठको यो उपस्थिति नेपाली फाइटिङ प्रतिभा र कौशललाई विश्वभरका दर्शकमाझ प्रस्तुत गर्ने एउटा सुनौलो र ऐतिहासिक अवसर बन्ने विश्वास गरिएको छ।