देवघाटधाम, असार ५ – राष्ट्रिय परीक्षा बोर्डले शुक्रबार सार्वजनिक गरेको कक्षा १२ को नतिजामा गुरुकुलतर्फ देवघाटधामस्थित वेद वेदाङ्ग संस्कृत विद्यापीठका विद्यार्थी सुधीर चालिसे देशभरकै सर्वोत्कृष्ट बनेका छन्।

चालिसेले ३.९२ जीपीए प्राप्त गर्दै गुरुकुल शिक्षातर्फ उत्कृष्ट नतिजा हासिल गरेको विद्यापीठले जनाएको छ। विद्यापीठका अनुसार यस वर्ष कक्षा १२ को परीक्षामा सहभागीमध्ये १८ जना विद्यार्थीले ए प्लस र १५ जनाले ए ग्रेड प्राप्त गर्दै सफल भएका छन्।

वेद वेदाङ्ग संस्कृत विद्यापीठ अष्टाङ्गयोगसिद्ध योगी ईश्वरानन्द ब्रह्मचारी (गलेश्वर बाबा) ले वि.सं. २०२३ सालमा वेद–वेदाङ्गको संरक्षण तथा प्रवर्द्धन गर्ने उद्देश्यले स्थापना गर्नुभएको संस्कृत विद्यालय हो। देवघाट क्षेत्रकै सबैभन्दा पुरानो संस्कृत विद्यापीठका रूपमा परिचित यस संस्थालाई हाल गलेश्वर आश्रमले सञ्चालन गरिरहेको छ।

विद्यापीठमा गुरुकुलीय पद्धतिअनुसार वेद, व्याकरण तथा संस्कृत वाङ्मयलगायत विषयको अध्ययन–अध्यापन हुँदै आएको छ। हाल यहाँ करिब ३०० विद्यार्थी अध्ययनरत छन्।

विद्यापीठले यस वर्षको उत्कृष्ट नतिजाले गुरुकुल शिक्षाप्रतिको आकर्षण र गुणस्तर थप पुष्टि गरेको जनाएको छ।