काठमाडौं । डा. धवलशम्सेर राणा र दुर्गा प्रसाईको नेतृत्वमा गठन हुन लागेको नयाँ राष्ट्रवादी राजनीतिक दल दर्ताको तयारी अन्तिम चरणमा पुगेको छ। दल दर्ताका लागि आवश्यक कागजात, विधान तथा हस्ताक्षर संकलनको काम अन्तिम चरणमा पुगेको नेताहरूले बताएका छन्।

सञ्चारकर्मीसँग कुरा गर्दै प्रस्तावित दलका नेता डा. धवलशम्सेर राणाले नयाँ दल दर्ताका लागि आवश्यक सबै तयारी पूरा हुने चरणमा रहेको र छिट्टै निर्वाचन आयोगमा दर्ताका लागि जाने जानकारी दिए।

उनका अनुसार दल दर्ताका लागि आवश्यक विधान, हस्ताक्षर संकलनलगायतका प्रक्रिया अन्तिम चरणमा पुगेका छन्।

प्रस्तावित दलका सचिवालय प्रमुख सगुन सुन्दर लावतीले देशभर तथा विदेशमा रहेका नेपालीबाट सकारात्मक प्रतिक्रिया प्राप्त भइरहेको दाबी गरे। राष्ट्रवादी विचारधारामा विश्वास गर्ने विभिन्न राजनीतिक समूह र अभियन्ताहरू नयाँ दलसँग सम्पर्कमा रहेको उनले बताए।

लावतीका अनुसार ‘राष्ट्रवादी प्रजातान्त्रिक दल’ गठनको प्रक्रिया अन्तिम चरणमा पुगेको छ र यसप्रति उत्साहजनक वातावरण बनेको छ।

यसअघि राष्ट्रवादी राजनीतिक धारको प्रतिनिधित्व गर्ने दल र नेताप्रति जनस्तरमा असन्तुष्टि रहेको उल्लेख गर्दै नयाँ दलले विश्वासिलो विकल्प प्रस्तुत गर्ने अपेक्षा गरिएको दाबी पनि नेताहरूले गरेका छन्।