काठमाडौं । एनएमबि बैंक लिमिटेडले देशका सातै प्रदेशका ग्राहकलाई लक्षित गर्दै ‘प्रदेश बचत खाता’ योजना सञ्चालनमा ल्याएको छ।

बैंकले स्थानीय पहिचान र क्षेत्रगत वित्तीय आवश्यकतालाई ध्यानमा राखेर सात प्रदेशका लागि सातवटा विशेष बचत खाता सार्वजनिक गरेको जनाएको छ। योजनाअन्तर्गत कोशी प्रदेशका लागि ‘कोशी बचत खाता’, मधेसका लागि ‘मिथिला बचत खाता’, बागमतीका लागि ‘बागमती बचत खाता’, गण्डकीका लागि ‘फेवा बचत खाता’, लुम्बिनीका लागि ‘बुद्ध भूमि बचत खाता’, कर्णालीका लागि ‘रारा बचत खाता’ तथा सुदूरपश्चिमका लागि ‘खप्तड बचत खाता’ सञ्चालनमा ल्याइएको छ।

बैंकका अनुसार डिजिटल बैंकिङ र बचत संस्कृतिलाई प्रोत्साहन गर्ने उद्देश्यले ल्याइएको यस योजनामा ग्राहकले पहिलो वर्ष निःशुल्क मोबाइल बैंकिङ, इन्टरनेट बैंकिङ तथा भिसा डेबिट कार्ड सुविधा प्राप्त गर्नेछन्। साथै, पहिलो वर्षका लागि डिम्याट र मेरोसेयर खाता निःशुल्क दर्ता गर्न सकिने व्यवस्था गरिएको छ। यसबाहेक अन्य आकर्षक सुविधासमेत उपलब्ध गराइने बैंकले जनाएको छ।

‘प्रदेश बचत खाता’ योजनामार्फत देशका सबै क्षेत्रमा सहज, आधुनिक र डिजिटल बैंकिङ सेवाको पहुँच विस्तार गर्ने लक्ष्य रहेको बैंकको भनाइ छ।

हाल एनएमबि बैंकले देशभर १९८ शाखा, १७६ एटीएम र ९ एक्सटेन्सन काउन्टरमार्फत बैंकिङ सेवा प्रदान गर्दै आएको छ।