काठमाडौं । प्रतिनिधि सभा सदस्य निर्वाचनको समानुपातिकतर्फको मतगणना अन्तिम चरणमा पुगेको छ। निर्वाचन आयोगका अनुसार हालसम्म १ करोड ७ लाख ३० हजार ५५१ मत गणना भइसकेको छ। पछिल्लो मत परिणामअनुसार राष्ट्रिय स्वतन्त्र पार्टी (रास्वपा) ले ५१ लाख ३५ हजार ६२१ मत अर्थात ४७.८६ प्रतिशत मत प्राप्त गर्दै अग्रस्थान कायम राखेको छ।

यस आधारमा पार्टीले समानुपातिकतर्फ सम्भावित १८२ सिट प्राप्त गर्ने अनुमान गरिएको छ। दोस्रो स्थानमा नेपाली कांग्रेस रहेको छ। कांग्रेसले १७ लाख ४७ हजार ७३७ मत अर्थात १६.२९ प्रतिशत मत प्राप्त गरेको छ, जसअनुसार पार्टीको सम्भावित सिट संख्या ३८ पुगेको छ।

त्यस्तै नेकपा एमाले तेस्रो स्थानमा रहेको छ। एमालेले १४ लाख ४८ हजार ३१८ मत अर्थात १३.५० प्रतिशत मत प्राप्त गर्दै सम्भावित २५ सिट सुरक्षित गरेको छ। यसैगरी नेकपा (तारा) ले ८ लाख ३ हजार ६२७ मत अर्थात ७.४९ प्रतिशत मत प्राप्त गर्दै सम्भावित १७ सिट प्राप्त गर्ने देखिएको छ।

श्रम संस्कृति पार्टी (माटो) ले ३ लाख ७८ हजार ५८७ मत अर्थात ३.५३ प्रतिशत मत प्राप्त गर्दै सम्भावित ७ सिट हासिल गरेको छ। राष्ट्रिय प्रजातन्त्र पार्टी (राप्रपा) ले हालसम्म ३ लाख २७ हजार २५ मत अर्थात ३.०५ प्रतिशत मत प्राप्त गर्दै थ्रेसहोल्ड कटाउन सफल भएको छ। यसअनुसार राप्रपाले सम्भावित ५ सिट प्राप्त गर्ने देखिएको छ। यस बाहेक अन्य दलहरूले भने आवश्यक थ्रेसहोल्ड कटाउन नसकेको निर्वाचन आयोगले जनाएको छ।