काठमाडौं, १० वैशाख २०८३ — डिजिटल रूपान्तरणलाई प्रवर्द्धन गर्ने उद्देश्यसहित माछापुच्छ्रे बैंक लिमिटेड ले ‘एमबीएल आईटी कर्जा’ नामक नयाँ कर्जा योजना सार्वजनिक गरेको छ। सूचना प्रविधि क्षेत्रमा सक्रिय व्यवसायी तथा उद्यमीहरूलाई लक्षित गर्दै ल्याइएको यस योजनाले नवप्रवर्तनलाई प्रोत्साहन गर्ने र नेपालमा विकासोन्मुख आईटी क्षेत्रलाई थप सुदृढ बनाउने बैंकको अपेक्षा रहेको छ।

बैंकका अनुसार, उक्त कर्जा योजनामार्फत आईटी तथा सफ्टवेयर कम्पनीहरूलाई चालु पुँजी, पूर्वाधार विकास तथा व्यवसाय विस्तारका लागि सहज वित्तीय पहुँच उपलब्ध गराइनेछ। यसले विशेषगरी सफ्टवेयर विकास, आईटी आउटसोर्सिङ, साइबर सुरक्षा, फिनटेक, कृत्रिम बुद्धिमत्ता (एआई) र मेशिन लर्निङ जस्ता क्षेत्रमा कार्यरत कम्पनीहरूलाई लाभ पुग्ने विश्वास गरिएको छ।

योजना अन्तर्गत कर्जा लिनका लागि सम्बन्धित सरकारी निकायमा दर्ता भएका आईटी÷सफ्टवेयर फर्म (एकल वा साझेदारी) तथा प्राइभेट लिमिटेड कम्पनीहरू योग्य हुनेछन्। साथै, यस्ता कम्पनीहरूले प्यान तथा भ्याट जस्ता करहरू नियमित रूपमा बुझाएको हुनुपर्नेछ र कम्तीमा दुई वर्षदेखि सञ्चालनमा रहेको हुनुपर्नेछ।

बैंकले यस योजनामार्फत नेपालको सूचना प्रविधि क्षेत्रमा लगानी अभिवृद्धि गर्दै डिजिटल अर्थतन्त्रलाई टेवा पुर्‍याउने लक्ष्य राखेको जनाएको छ।