सेक्स प्रस्ताव अस्वीकार गरेपछि एक महिलाको नग्न फोटो सामाजिक सञ्जाल फेसबुकबाट सार्वजनिक गर्ने एक युवक पक्राउ परेका छन् ।

फेसबुकमा महिलाको नग्न फोटो सार्वजनिक गरेको भन्दै प्रहरीले २० वर्षीय दिवश कामतलाई पक्राउ गरेको छ ।

जनकपुरधाम उपमहानगरपालिका–१० निवासी दिवश कामतले महिलाको नग्न फोटो फेसबुकमा सार्वजनिक गरेपछि प्रहरीले उनलाई पक्राउ गरेको हो । कामतले फेसबुकको फेक आईडी बनाएर त्यसमार्फत केही समय अघिदेखि महिला साथीहरुसँग कुरा गर्दै आएका थिए ।

च्याटकै क्रममा उनले महिलासँग अनैतिक सम्बन्धको लागि दबाव दिन थाले । महिला त्यसको लागि तयार नभएपछि उनको नग्न तस्बिर सार्वजनिक गरिदिएको खुलेको प्रहरीले जानकारी दिएको छ ।

पीडित महिलाले कामतविरुद्ध प्रहरीमा उजुरी दिएपछि उनलाई पक्राउ गरिएको धनुषाका प्रहरी नायब उपरीक्षक दिपेन्द्र शाहीले बताएका छन् । कामतविरुद्ध साइबर क्राइम अन्तर्गत मुद्दा दर्ता गरी थप अनुसन्धान प्रक्रिया अघि बढाइएको प्रहरीले बताएको छ ।