काठमाडौं । प्रगतिशील नेपाल राष्ट्रिय शिक्षक संगठनको पहिलो महाधिवेशनले हिक्मतबहादुर बस्नेतको अध्यक्षतामा १ सय २ सदस्यीय केन्द्रीय कार्य समितिको सर्वसम्मत चयन गरेको छ ।

बिहीबार काठमाडौंमा आयोजित पत्रकार सम्मेलनमा दिइएको जानकारी अनुसार संगठनको पहिलो महाधिवेशनले २५ पदाधिकारी र ७४ सदस्य गरी कुल ९९ सदस्यीय केन्द्रीय समिति र राजेन्द्र तिम्सिनाको संयोजकत्वमा ३ सदस्यीय लेखा समितिको सर्वसम्मत चयन गरेको हो ।

महाधिवेशनले महासचिव हरिदेव यादवद्वारा प्रस्तुत राजनीतिक र सांगठनिक प्रतिवेदन तथा विधान संसोधन प्रस्ताव एवं कोषाध्यक्ष पुष्पराज कुँवरले प्रस्तुत गरेको आर्थिक प्रतिवेदनलाई पारित गरेको छ ।

साथै महाअधिवेशनले १८ बुँदे समसामयिक प्रस्ताव पनि पारित गरेको छ ।

‘‘समाजवादी शिक्षा, समृद्ध नेपाल निर्माणका आधार, गुणस्तरीय शिक्षा, पेसागत सुरक्षा र सुदृढ सङ्गठन, हाम्रो सरोकार’’ भन्ने नारासहित शुरु भएको सङ्गठनको पहिलो महाधिवेशन चैत २८ र २९ गते दुई दिन सम्म चलेको थियो ।

महाधिवेशनमा सातओटै प्रदेशका विभिन्न जिल्लाबाट प्रतिनिधित्व गर्दै आएका ४०० प्रतिनिधि र पर्यवेक्षक शिक्षकहरू सहभागी थिए ।