काठमाडौं । प्रधानमन्त्री पुष्पकमल दाहाल प्रचण्डले दिगो आर्थिक विकासमा निर्माण व्यवसायको महत्वपूर्ण भूमिका रहेको बताएका छन् ।

बिहीबार एसियाली र पश्चिमी प्रशान्त क्षेत्रका निर्माण व्यवसायीहरुको ४६औँ अन्तर्राष्ट्रिय सम्मेलनलाई सम्बोधन गर्दै उनले दिगो विकासमा निर्माण व्यवसायको महत्वपूर्ण भूमिका हुने भन्दै विकासका लक्ष्य हासिल गर्न सरकार आवश्यक उपायहरु कार्यान्वयन गर्न सक्रियतापूर्वक लागेको उल्लेख गरे ।

‘निर्माण उद्योगले हरितगृह ग्यास उत्सर्जनमा महत्वपूर्ण योगदान गरेको छ भन्ने कुरा स्वीकार गर्छौं । निर्माण क्षेत्रले भविष्यलाई आकार दिनमा निर्णायक भूमिका खेल्छ, र नेतृत्वदायी हरित निर्माण पहलहरूमा निजी क्षेत्रको सक्रिय सहभागिता देख्न पाउनु खुशीको कुरा हो तर पनि आर्थिक विकासमा सबै क्षेत्र जिम्मेवार हुनुपर्छ भन्ने कुरामा हामी राम्ररी जानकार छौं,’ दाहालले भने ।

दिगो आर्थिक विकास र निर्माणका लागि निजी क्षेत्रले नेतृत्व लिन आवश्यक रहेको उल्लेख गर्दै उनले नेपालले सन् २०४५ सम्म कार्वन उत्सर्जन शून्यमा ल्याउने अन्तर्राष्ट्रिय प्रतिवद्धता पूरा गर्न कार्य गरिरहेको जानकारी दिए ।

उनले सरकार दिगो पूर्वाधारको प्रवर्द्धनका लागि प्रतिवद्ध रहेको भन्दै दिगो पूर्वाधार विकास नै सरकारको प्रमुख प्राथमिकता रहेको चर्चा गरे ।

उनले भने, ‘सरकार दिगो लक्ष्यहरू प्राप्त गर्न, यसका उपायहरू कार्यान्वयन गर्न सक्रिय छ । हामी सार्वजनिक र निजी क्षेत्रहरू र अर्थपूर्ण परिवर्तनहरू सञ्चालन गर्न सबै सम्बन्धित सरोकारवालाबीच सहकार्यको महत्व बुझ्छौं ।’