काठमाडौं–प्रभु बैंक लिमिटेडले असार ११ देखि २२ लाख ३१ हजार २६५ कित्ता शेयर लिलामी बिक्रीमा ल्याएको छ । बैंकले संस्थापक समूहतर्फको १५ लाख ६० हजार २०३ कित्ता र सर्वसाधारण समुह तर्फको ६ लाख ७१ हजार ६२ कित्ता शेयर लिलामीमा ल्याएको हो । लगानीकर्ताले असार ११ देखि १८ गतेसम्म लिलामी शेयरमा शिलबन्दी बोलपत्र पेश गर्न सक्नेछन् ।
बैंकको शेयर बिक्री प्रबन्धक प्रभु क्यापिटल रहेको छ । लिलामी शेयरमा प्रभु क्यापिटल कमलादी, प्रभु बैंकको केन्द्रीय कार्यालय बबरमहल, शाखा कार्यालयहरु आदर्शनगर बिरगञ्ज, जलजलाचोक विराटनगर, मिलनचोक बुटवल, न्यूरोड पोखरा, बिरेन्द्रनगर सुर्खेत, सुर्खेत रोड नेपालगञ्ज, गोदावरी रोड धनगढी, हल्लाचोक बाग्लुङ्ग र कावासोती नवलपरासीबाट शिलबन्दी बोलपत्र आवेदन गर्न सकिने छ । संस्थापक शेयरका लागि न्यूनतम एक हजार कित्ता र साधारण शेयरका लागि एक सय कित्ता शेयरका लागि निवेदन दिनुपर्नेछ । लगानीकर्ताले न्यूनतम एक सय रुपैयाँ वा सोभन्दा बढी मूल्यमा १० कित्ताको गुणाङ्कमा लिलामीमा आएको अधिकतम सबै कित्ता माग गर्न सक्नेछन् ।