काठमाडौँ, वैशाख १७ — Nepal Bank Limited र Rastriya Beema Company Limited बीच कर्जा सुविधा उपलब्ध गराउने सम्बन्धमा सम्झौता भएको छ।

सम्झौताअनुसार राष्ट्रिय बीमा कम्पनीमा कार्यरत स्थायी कर्मचारीहरूले नेपाल बैंकको काठमाडौं बैंकिङ अफिस शाखामार्फत व्यक्तिगत प्रयोजनका लागि १५ लाख रुपैयाँसम्म विनाधितो कर्जा लिन सक्नेछन्।

बैंकका अनुसार यस व्यवस्थाबाट कर्मचारीहरूले एकै स्थानबाट वित्तीय आवश्यकता पूरा गर्न सक्ने, समय बचत हुने तथा दुई संस्थाबीचको सहकार्य थप सुदृढ हुने अपेक्षा गरिएको छ।

वैशाख १६ गते नेपाल बैंकको प्रधान कार्यालयमा आयोजित कार्यक्रममा बैंकका तर्फबाट रिटेल कर्जा प्रमुख अर्जुन बहादुर कंडेल र राष्ट्रिय बीमा कम्पनीका तर्फबाट मुख्य व्यवस्थापक डा. सृजना पन्तले सम्झौतामा हस्ताक्षर गरेका थिए।

नेपाल बैंकले देशभर २३१ शाखा, २४६ एटीएम र ६१ एक्सटेन्सन काउन्टरमार्फत करिब २७ लाख ग्राहकलाई सेवा दिँदै आएको जनाएको छ।