काठमाडौं । आईएमई लाइफ इन्स्योरेन्स कम्पनी लिमिटेडले आफ्नो संस्थागत सामाजिक उत्तरदायित्व अन्तर्गत फेलोसिप सोसाइटी नेपाललाई ५ लाख रुपैयाँ आर्थिक सहयोग प्रदान गरेको छ।

कम्पनीले प्रदान गरेको उक्त सहयोगबाट देशका विभिन्न विद्यालयमा अध्ययनरत दृष्टिविहीन विद्यार्थीहरूका लागि आवश्यक ब्रेल कागज, स्लेट तथा स्टाइलस, कम्प्युटर र स्क्रिन रिडर सफ्टवेयरलगायत शैक्षिक सामग्री उपलब्ध गराइने जनाएको छ।

आईएमई लाइफ इन्स्योरेन्सका अनुसार उक्त सहयोगबाट ललितपुर, काठमाडौं, दाङ र सुर्खेतका तीन विद्यालयमा अध्ययनरत दृष्टिविहीन विद्यार्थीहरू प्रत्यक्ष रूपमा लाभान्वित हुनेछन्। यस सहयोगले ती विद्यालयमा अध्ययनरत विद्यार्थीहरूको शिक्षामा सहज पहुँच सुनिश्चित गर्न मद्दत पुग्ने विश्वास कम्पनीले व्यक्त गरेको छ।

कम्पनीले समावेशी शिक्षा र समान अवसरलाई सामाजिक विकासको महत्वपूर्ण आधार मान्दै यस्ता सामाजिक कार्यक्रमलाई प्राथमिकता दिँदै आएको जनाएको छ। दृष्टिविहीन विद्यार्थीहरूलाई आवश्यक शैक्षिक सामग्री उपलब्ध गराउँदा उनीहरूको शैक्षिक उपलब्धि तथा आत्मविश्वासमा सकारात्मक प्रभाव पर्ने अपेक्षा गरिएको छ।

फेलोसिप सोसाइटी नेपालले सन् २००० देखि दृष्टिविहीन बालबालिकाको शिक्षा तथा अधिकारको क्षेत्रमा काम गर्दै आएको छ। संस्थाको अनुभव र आईएमई लाइफ इन्स्योरेन्सको सामाजिक प्रतिबद्धताले समावेशी समाज निर्माणमा महत्वपूर्ण योगदान पुग्ने विश्वास व्यक्त गरिएको छ।

‘Ensuring Future’ मूलमन्त्रलाई आत्मसात गर्दै आईएमई लाइफ इन्स्योरेन्सले शिक्षा, स्वास्थ्य, वातावरण संरक्षण, वित्तीय साक्षरता तथा सामुदायिक विकासका क्षेत्रमा विभिन्न सामाजिक उत्तरदायित्व कार्यक्रम सञ्चालन गर्दै आएको जनाएको छ।