नेपालगञ्ज, असार २३ — एलजी इलेक्ट्रोनिक्सले नेपाली उपभोक्ताको आवश्यकता र जीवनशैलीलाई लक्षित गर्दै नयाँ घरेलु उपकरण शृंखला ‘एलजी एसेन्सियल सिरिज’ सार्वजनिक गरेको छ।

कम्पनीले आफ्नो आधिकारिक वितरक सीजी इलेक्ट्रोनिक्ससँगको सहकार्यमा नेपालगञ्जस्थित सिद्धार्थ कटेजमा आयोजित कार्यक्रममा उक्त शृंखलाको औपचारिक अनावरण गरेको हो।

‘हरेक घरको खुशी, घर–घरमा एलजी’ अभियानअन्तर्गत सार्वजनिक गरिएको यस शृंखलामा आधुनिक प्रविधि, उत्कृष्ट कार्यसम्पादन, टिकाउपन तथा किफायती मूल्यलाई प्राथमिकता दिइएको कम्पनीले जनाएको छ। नेपाली परिवारको दैनिक आवश्यकता तथा स्थानीय परिस्थितिलाई ध्यानमा राखेर उत्पादनहरू विकास गरिएको कम्पनीको दाबी छ।

एसेन्सियल सिरिजअन्तर्गत नेपाली बजारका लागि विशेष रूपमा डिजाइन गरिएका दुई ढोके फ्रस्ट–फ्री रेफ्रिजेरेटर, पूर्ण स्वचालित माथिबाट कपडा राख्ने धुने मेसिन तथा कोठा चिस्याउने तथा तताउने वातानुकूलन यन्त्र सार्वजनिक गरिएको छ।

कम्पनीका अनुसार फ्रस्ट–फ्री प्रविधियुक्त रेफ्रिजेरेटरमा स्मार्ट मोड, स्वचालित चिस्यान नियन्त्रण तथा अघिल्ला मोडेलको तुलनामा २० प्रतिशत बढी तरकारी भण्डारण क्षमता रहेको छ।

यस्तै, धुने मेसिनमा प्रोशिल्ड मोटर, पानी प्रतिरोधी नियन्त्रण प्यानल तथा कम पानीको चापमा पनि प्रभावकारी धुलाई गर्ने प्रविधि समावेश गरिएको जनाइएको छ।

त्यसैगरी, ऊर्जा–दक्ष वातानुकूलन यन्त्रले कोठा चिस्याउने र तताउने दुवै सुविधा प्रदान गर्ने, कम विद्युत् खपत गर्ने तथा वातावरणमैत्री आर–३२ शीतलक ग्यास प्रयोग गरिएको कम्पनीले जनाएको छ।

कम्पनीका अनुसार एसेन्सियल सिरिजका उत्पादनहरूको बिक्री–वितरण नेपालभरि सन् २०२६ को जुन महिनादेखि सुरु हुनेछ। प्रारम्भिक मोडेलको मूल्य करिब ४९ हजार ६९० रुपैयाँबाट सुरु हुनेछ। उत्पादनहरू देशभरका आधिकारिक एलजी ब्रान्ड शोरुम, बहुब्रान्ड खुद्रा बिक्री केन्द्र तथा प्रमुख विद्युतीय व्यापार (ई–कमर्स) मञ्चमार्फत उपलब्ध हुने कम्पनीले जनाएको छ।

सीजी इलेक्ट्रोनिक्स नेपालमा एलजी उत्पादनहरूको आधिकारिक वितरक हो। कम्पनीले एलजी इलेक्ट्रोनिक्ससँग चार दशकभन्दा लामो समयदेखि सहकार्य गर्दै आएको जनाएको छ।