सुली मिसाउँदा आँधीखोलामा प्रदुषण हुनुका साथै १३ टन माछासहितका जलचर मारिएको घटनामा जिल्ला प्रशासन स्याङजाले खिलुङ कालिका एग्रो फर्मलाई ४५ सय जरिवाना र २० लाख रूपैयाँ क्षतिपूर्ति तिर्नुपर्ने फैसला गरेको छ ।

घटनाको पाँच महिनापछि जिल्ला प्रशासन कार्यालयले जलचर ऐन २०१७ को दफाअनुसार जरिवानाको कारबाही गरिएको जनाएको हो । घटना छानविन गर्न गठिन समितिद्धारा बुझाइएको प्रतिवेदनलाई आधार मान्दै जरिवाना र क्षतिपूर्ति तोकिएको कामु प्रमुख जिल्ला अधिकारी कोशहरि निरौलाले बताउनुभयो ।

जरिवानासँगै एग्रो फर्मले मारिएका जलचर वापत २० लाख रुपैयाँ क्षतिपूर्ति तिर्नुपर्नेछ । आँधीखोलामा ३ लाख ५० हजार माछाको भुरा छाड्ने निर्णय भएको पनि उहाँले बताउनुभयो ।

गत बैशाख २१ ग्ते भीरकोट–६ स्थित एग्रो फर्मले आँधीखोलामा कुखुराको सुलीसहितको फोहोर बगाएपछि जलचरहरु मरेर सखाप भएका थिए ।

सुली बगाएको घटनाको भोलिपल्ट गल्याङ–३ स्थित आँधीखोला जलविद्युत आयोजनाको जलाशयमा मरेका जलचर तैरिएका देखिएको थियो । उल्लेख्य संख्यामा मरेका जलचर तैरिएको देखिएपछि घटना सार्वजानिक भएको थियो ।

ठूलो परिमाणमा सुलीसहितको फोहोर नदीमा बगाउँदा ३ किमी क्षेत्रसँगै गल्याङका ३, ७ र ९ नम्बर वडा प्रत्यक्ष रुपमा प्रभावित भएका थिए ।