काठमाडौं । दुवै मिर्गौला फेल भएकी दमक नगरपालिका वडा नम्बर–०५ झापा स्थायी घर भएकी पदम कुमारी बेघाको उपचार सहयोगार्थ ‘जीवनका लागि संगीत यात्रा–२०७७’ हुने भएको छ । पदम कुमारी बेघा बचाउ अभियान र युथ ग्रुप नेपाल प्रा.ली.को आयोजनामा उक्त संगीत यात्रा देशका मुख्य–मुख्य शहरमा सञ्चालन गरिने जनाईएको छ ।
आज (शनिबार) रिपोर्टर्स क्लब नेपालमा पत्रकार सम्मेलनको आयोजना गरेर दुवै मिर्गौला फेल भएकी बेघाको उपचारमा सहयोगको लागि आयोजक संस्थाहरूले अपिलसमेत गरेका छन् । पीडित बेघाका छोरा अविन मेन्थ्याङ्बोले दिएको जानकारीअनुसार हालसम्म आमाको उपचारको लागि झापाका लायन्स क्लबहरुले ७० हजार रुपैयाँ आर्थिक सहयोग प्रदान गरेका छन् ।

कार्यक्रममा बोल्दै युथ ग्रुप नेपाल प्रा.ली.का प्रवन्ध निर्देशक अशोक क्षेत्रीले बेघाको उपचारको लागि अपिल गरे । र, क्षेत्रीले आफूहरुले उनको उपचारमा सहयोग पुर्याउने उद्देश्यले नै संगीत यात्रा कार्यक्रम आयोजना गर्न लागेको जानकारी दिए । उनले भने,‘यो कार्यक्रममार्फत जुट्ने सबै रकम उहाँको उपचारमा खर्च गर्छौं ।’
त्यस्तै, गायक राज लावुङले बेघाको उपचारको लागि आफूले गीत तथा संगीतसम्बन्धी सम्पूर्ण संघ÷संस्थाहरुलाई अपिल गर्ने र आफू सांगीतिक यात्रा अवधिभर साथै रहनेपनि विश्वास दिलाए । कार्यक्रमको सञ्चालन भने अविन मेन्थ्याङ्बोले गरेका थिए । मिर्गौला पीडित बेघाका एकमात्र छोरा छन् । उनी पछिल्लो दुई वर्षदेखि किड्नीको समस्यामा झेल्दै आएकी छिन् ।