सरकारले ताप्लेजुङको ऐतिहासिक एवं धार्मिक क्षेत्र मुक्कुम्लुङ पाथीभरामा निर्माण हुन लागेको केवलकारका कारण लामो समयदेखि उत्पन्न विवाद र समस्या समाधानका लागि एक उच्चस्तरीय कार्यदल गठन गरेको छ। प्रधानमन्त्री तथा मन्त्रिपरिषद् कार्यालयको सचिवस्तरको बिहीबारको निर्णयानुसार प्रधानमन्त्री वालेन्द्र शाहका सामाजिक विकास विज्ञ विश्व राईको संयोजकत्वमा सात सदस्यीय कार्यदल गठन गरिएको हो। प्रधानमन्त्रीका प्रेस तथा अनुसन्धान विज्ञ दीपा दाहालका अनुसार यो कार्यदललाई पाथीभरा मन्दिर जाने केवलकार निर्माण सम्बन्धमा लामो समयदेखि देखिएका विवाद तथा समस्या पहिचान गरी सोको दीर्घकालीन समाधानका लागि १५ दिनभित्र ठोस सुझाव पेस गर्ने समयसीमा तोकिएको छ।

लामो समयदेखि तन्किँदै गएको यो संवेदनशील विवादलाई किनारा लगाउन सरकारले सबै सरोकारवाला पक्षहरूलाई समेटेर सन्तुलित कार्यदलको रूपरेखा तयार पारेको हो। गठित सात सदस्यीय कार्यदलमा संयोजक राईसहित पूर्वाधार विकास मन्त्रालयका सिनियर डिभिजनल इन्जिनियर, केवलकार निर्माणप्रति असहमति र असन्तुष्टि जनाउँदै आएका आन्दोलनरत पक्षका प्रतिनिधि तथा पाथीभरा क्षेत्र विकास समितिका प्रतिनिधिलाई सदस्यका रूपमा समावेश गरिएको छ।

यसका साथै केवलकार निर्माणको जिम्मेवारी पाएको निजी कम्पनीका प्रतिनिधि, शान्ति सुरक्षा र प्रशासनिक समन्वयका लागि गृह मन्त्रालयका उपसचिव र प्रधानमन्त्री वालेन्द्र शाहको सचिवालयका स्वकीय सहसचिवलाई पनि कार्यदलमा सदस्यको जिम्मेवारी दिइएको छ। सबै सरोकारवाला र कानुनी निकायका प्रतिनिधिहरू एकै ठाउँमा बसेर छलफल गर्ने वातावरण बनेकाले विगत लामो समयदेखि स्थानीय तथा सांस्कृतिक तहमा गिजोलिएको पाथीभरा केवलकारको निर्माण कार्य र यसले उब्जाएका बहुआयामिक विवादहरूले अबको दुई हप्ताभित्र निकास पाउने विश्वास लिइएको छ।