काठमाडौँ । मर्जरका कारण एकै ठाउँमा शाखाहरु दोहोरिएपछि सिटिजन्स बैंकले ५ शाखा कार्यालय बिक्रीमा राखेको छ। बैंकले बाग्मतिका २ र लुम्बिनीका ३ शाखा बिक्रीमा राखेको हो।

बैंकले गत चैतमा तिनाउ मिसन डेभलपमेन्ट बैंक र गत असारमा सृजना फाइनान्सलाई गाभेको थियो। मर्जरपछि एकै ठाउँमा शाखाहरु दोहोरिएका थिए। ती दोहोरिएका शाखा बन्द छन्। बैंकले बन्द गरिएका शाखा अन्यत्र खोल्नु पर्ने हुन्छ।

बैंकले तयारी अवस्थामा रहेका बुटवल, नारायणगढ, भुमही, घोराही र टाँडीको शाखा बिक्री गर्न लागेको हो। बैंकले यी शाखा बैंक तथा वित्तीय संस्थासहित बीमा कम्पनी सहकारी वा अन्य कार्यालयलाई पनि उपयोगी हुने जनाएको छ।

खरीद गर्न इच्छुकले सात दिनभित्र आवेदन दिनु पर्छ। कतिमा खरीद गर्ने हो त्यो पनि जानकारी गराउनु पर्छ। बैंकले न्यूनतम मूल्य तोकेको छैन। जानकारका अनुसार, अहिलेको मूल्यमा एउटा ठिकैको शाखा बनाउन पनि ५० लाखजति खर्च हुन्छ। यसभन्दा माथि ठाउँ र डेकोरेसनले मूल्य बढ्दै जान्छ।