काठमाडौं । नेपाल इन्भेष्टमेन्ट र मेगा बैंक मर्ज भई बनेको नेपाल इन्भेष्टमेन्ट मेगा बैंकले चालु आर्थिक वर्षको ६ महिनामा २ अर्ब बढी खुद नाफा कमाएको छ ।

बैंकले बिहीबार सार्वजनिक गरेको चालु आर्थिक वर्षको दोस्रो त्रैमासको अपरिष्कृत वित्तीय विवरण अनुसार पुस मसान्तसम्म २ अर्ब ८ करोड ६३ लाख रुपैयाँ खुद नाफा कमाएको छ।

यो गत आर्थिक वर्षको सोही अवधिको तुलनामा ४६ करोड रुपैयाँ बढी हो। गत आर्थिक वर्षको सोही अवधिसम्ममा बैंकले १ अर्ब ६२ करोड ४३ लाख रुपैयाँ खुद नाफा कमाएको थियो।

खुद ब्याज आम्दानी, सञ्चालन नाफा, फी तथा कमिशन बढेसँगै बैंकको खुद नाफामा सुधार आएको हो । बैंकको ब्याज आम्दानी ७३.९२ प्रतिशत बढेर ४ अर्ब १८ करोड र सञ्चालन नाफा २३.८८ प्रतिशत बढेर २ अर्ब ९८ करोड रुपैयाँ पुगेको छ ।

हाल ३४ अर्ब १२ करोड रुपैयाँ चुक्ता पूँजी रहेको बैंकको सेयर प्रिमियममा २० करोड, रिजर्भ कोषमा २३ अर्ब ५९ करोड संचित छ भने रिटेन्ड अर्निङमा १ अर्ब १० करोड ऋणात्मक छ । समीक्षा अवधिमा बैंकको वितरण योग्य नाफा ९४ करोड ८४ लाख रुपैयाँ छ ।

समीक्षा अवधिमा बैंकले ३ खर्ब ५५अर्ब रुपैयाँ निक्षेप संकलन गरी ३ खर्ब १७ अर्ब कर्जा लगानी गरेको छ । चुक्ता पूँजीको अनुपातमा बैंकको नाफा बढ्न नसक्दा प्रतिसेयर आम्दानीमा भने गिरावट आएको छ । बैंकको प्रतिसेयर आम्दानी १७.७४ रुपैयाँबाट घटेर १५.६१ रुपैयाँमा सीमित भएको छ ।

समीक्षा अवधिमा बैंकको प्रतिसेयर नेटवर्थ १६६.५२ रुपैयाँ, बेसरेट १०.५० प्रतिशत, मूल्य आम्दानी अनुपात १५.७७ गुणा, खराब कर्जा ३.७१ प्रतिशत रहेको छ ।