काठमाडौं, असार २१ – आगामी भदौ ९ देखि १४ गतेसम्म आयोजना हुने ‘एचपी प्रेजेन्ट्स नाडा अटो शो २०२६’ का लागि स्टल बाँडफाँट प्रक्रिया सम्पन्न भएको छ।

नाडा अटोमोबाइल्स एशोसिएसन अफ नेपाल (नाडा) ले आयोजना गर्ने १८औँ संस्करणको उक्त प्रदर्शनीमा सवारीसाधन, पार्टपुर्जा, वित्तीय सेवा तथा अटोमोबाइल क्षेत्रसँग सम्बन्धित विभिन्न संघसंस्थाहरूको सहभागिता रहनेछ।

नाडाले गत महिना स्टलका लागि दर्ता खुला गरेको थियो। आइतबार नाडा सचिवालयमा आयोजित कार्यक्रममा नाडाका अध्यक्ष, निवर्तमान अध्यक्ष, पदाधिकारी, केन्द्रीय कार्यसमितिका सदस्य तथा सहभागी कम्पनीका प्रतिनिधिहरूको उपस्थितिमा गोला प्रथामार्फत स्टल बाँडफाँट गरिएको हो।

गोला प्रथाअनुसार १९ वटा यात्रुवाहक सवारीसाधन, १० वटा दुईपाङ्ग्रे सवारीसाधन, १७ वटा हल्का व्यावसायिक सवारीसाधन तथा ७६ वटा साना स्टलमध्ये ४५ वटा अटो कम्पोनेन्ट्स कम्पनीलाई स्टल उपलब्ध गराइएको नाडाले जनाएको छ।

कार्यक्रममा नाडाका महासचिव मिलनबाबु मल्लले अटो शोमा सहभागी हुने सबै कम्पनीहरूप्रति आभार व्यक्त गर्दै प्रदर्शनीलाई सफल बनाउन सबैको सहकार्य आवश्यक रहेको बताउनुभयो।

नाडा अटो शो नेपालकै सबैभन्दा ठूलो र प्रतिष्ठित अटोमोबाइल प्रदर्शनीका रूपमा परिचित छ। यस वर्षको प्रदर्शनीले अटोमोबाइल क्षेत्रका नवीन प्रविधि, नयाँ मोडेल तथा सेवाहरूलाई एकै थलोमा प्रस्तुत गर्ने अपेक्षा गरिएको छ।