काठमाडौं । नेपाल स्टक एक्चेन्स (नेप्से)को भवन अगाडिबाट शुक्रबार दिउँसो पक्राउ परेका तीन जना लगानीकर्तालाई प्रहरीले साँझ पक्राउ गरेकै स्थानमा लगेर छोडेकोे छ । सरकारले पूँजि बजारसंग सम्बन्धित ५८ बुँदे माग पूरा नगरेको भन्दै उनीहरु नेस्से घेर्न पुगेका थिए ।

शेयर बजारका लगानीकर्ता त्रय तिलक कोइराला, नयन वास्तोला र अर्जुन कोइरालालाई प्रहरीले नेप्से भवन अगाडिबाट दिउँसो नियन्त्रणमा लिएको थियो ।

रिहा भएपछि लगानीकर्ता समेत रहेका अभियान्ता तीलक कोइरालाले भने आफुहरु यसअघि सम्झौता भएका मागबारे ध्यानाकर्षण गराउन गएका बेला नेप्सेले प्रहरी लगाएर धरपकड गरेको आरोप लगाएका छन् ।

उनले भने ‘हामि नेप्से परिसरमा यसअघि भएका सम्झौता कार्यान्वयनका लागि आग्रह गर्न गएका हौं । तर, नेप्सेले प्रहरी लगाएर हामिमाथि दमन गर्र्यो । यसको जवाफ अब लगानीकर्ताले दिने छन् । आइतबार पनि हाम्रो दबाब कार्यक्रम जारी रहने छ ।’

तिलक कोइराला पूँजिबजारको स्थाइत्वका लागि पटक पटक अनसन बस्दै र नेप्से क्षेत्रको सुधारका लागि विभिन्न अभियानको सञ्चालन र नेतृत्व गर्दै आएका लगानीकर्ता हुन् भने नयन र अर्जुन पनि लगानीकर्ता हुन् ।