देशमा नयाँ द्वन्द्व सुरु गर्न खोजिएको अध्यक्ष बुढाथोकीको आरोप
Sunday Mar 26, 2023
वि.सं.२०७९ चैत १२ आइतवार १७:३३
काठमाडौँ । नेकपा माओवादी समाजवादीका अध्यक्ष कर्ण जीत बुढाथोकीले देशमा नयाँ द्वन्द्वको सुरुवात गर्न खोजिएको आरोप लगाएका छन् ।
माओवादी पार्टीहरुबीचको एकता, ध्रुवीकरणको भ्रम र यथार्थबारे आइतबार आयोजित पत्रकार सम्मेलनमा बोल्दै उनले, नयाँ द्वन्द्व सुरु गर्नकै लागि चौतर्फी रूपमा माओवादीमाथि आक्रमण भै रहेको आरोप लगाए ।
उनले माओवादी आन्दोलनबाट प्राप्त उपलब्धिको रक्षा गर्न माओवादी पार्टीबीचको एकता आवश्यक भएको बताए ।
१० वर्षे जनयुद्ध १९ दिने आन्दोलन र विभिन्न समयमा भएका आन्दोलनबाट प्राप्त सङ्घीयता, गणतन्त्र, धर्मनिरपेक्षता र समानुपातिक समावेशी जस्ता राजनैतिक उपलब्धिहरूको रक्षा गर्दै वैज्ञानिक समाजवाद स्थापना गर्ने पार्टी र शक्तिहरू एकातिर उभिन आवश्यक भएको उनको तर्क छ ।
रूपान्तरण सहित माओवादी एकता आजको आवश्यकता बनेको भन्दै उनले एकताबद्ध हुन सम्पूर्ण माओवादी पार्टी र नेताहरूलाई अनुरोध गरेका छन् ।
