काठमाडौं । पाकिस्तान दूतावास, काठमाडौंले १३औँ वार्षिक ‘पाकिस्तानका राजदूत निबन्ध लेखन प्रतियोगिता’ तथा ९औँ वार्षिक ‘पाकिस्तानका राजदूत वक्तृत्वकला प्रतियोगिता–२०२६’ का विजेताहरूलाई पुरस्कार वितरण गरेको छ।

मंगलबार काठमाडौंमा आयोजित कार्यक्रममा नेपालका लागि पाकिस्तानका राजदूत अबरार एच हाश्मी प्रमुख अतिथि रहेका थिए।

यस वर्ष पाकिस्तानका संस्थापक मोहम्मद अली जिन्नाको १५०औँ जन्मजयन्तीको अवसरमा “कायदे–आजम मोहम्मद अली जिन्नाले संवैधानिक माध्यमबाट पाकिस्तानको मागलाई मूलधारमा ल्याएको भूमिका” विषयमा निबन्ध प्रतियोगिता आयोजना गरिएको थियो।

निबन्ध प्रतियोगितामा विश्व निकेतन माध्यमिक विद्यालय, काठमाडौंका प्रतिक पोखरेल प्रथम, चाँदबाग विद्यालय, काठमाडौंका दक्षेश घिमिरे द्वितीय तथा प्राञ्जली वर्ल्ड स्कूल, काठमाडौंका नितिन थापा तृतीय भएका छन्। विजेताहरूलाई प्रमाणपत्र तथा नगद पुरस्कार प्रदान गरिएको थियो। साथै उत्कृष्ट १२ अन्य विद्यार्थीलाई पनि विशेष नगद पुरस्कार र प्रमाणपत्र प्रदान गरिएको दूतावासले जनाएको छ।

त्यसैगरी वक्तृत्वकला प्रतियोगितामा उच्च माध्यमिक तथा विश्वविद्यालय तहका विद्यार्थीहरूले “के कृत्रिम बुद्धिमत्ताले पुस्तकालयलाई विस्थापित गर्नेछ?” विषयमा आफ्नो धारणा प्रस्तुत गरेका थिए।

प्रतियोगितामा रिलायन्स कलेज, काठमाडौंकी विश्वकला नेपाल प्रथम, नेशनल ल कलेज, काठमाडौंका छिरिङ तामाङ द्वितीय तथा सेन्ट जेभियर्स कलेज, मैतीघरका बिप्युम चौलागाईं तृतीय भएका छन्। सहभागी विद्यार्थीहरूलाई प्रमाणपत्र र नगद पुरस्कार प्रदान गरिएको थियो।

दूतावासका अनुसार नेपालभरका ५० भन्दा बढी उच्च माध्यमिक विद्यालय तथा विश्वविद्यालयका विद्यार्थीहरूले प्रतियोगितामा सहभागिता जनाएका थिए। प्रतियोगिता पछिल्ला दुई सातादेखि चरणबद्ध रूपमा सञ्चालन गरिएको थियो।

समापन मन्तव्यका क्रममा राजदूत हाश्मीले विद्यार्थीहरूको समालोचनात्मक सोचको प्रशंसा गर्दै यस्ता कार्यक्रमले नेपाल र पाकिस्तानबीचको सम्बन्ध अझ मजबुत बनाउन सहयोग पुग्ने बताए।

दूतावासका अनुसार यी दुवै प्रतियोगिता क्रमशः विगत १३ र ९ वर्षदेखि निरन्तर आयोजना हुँदै आएका छन् र नेपाली युवामाझ लोकप्रिय छन्।