काठमाडौं । ललितपुर नगरपालिकाका मेयर चिरीबाबु महर्जनले ललितपुर महानगरपालिका भित्र पर्यटकहरूको भ्रमण अवधि लम्ब्याउन पर्यटक बसको व्यवस्था गर्ने बताएका छन् ।

 

मंगलबार ललितपुर महानगरपालिकाद्धारा आयोजित यल कोसेली घरको शुभारम्भ कार्यक्रममा मेयर महर्जनले सुरुवाती बिन्दू पाटन ढोकाबाट आरम्भ गरेर र त्यहीँ अन्त्य हुने गरी बसको व्यवस्था गर्ने योजना रहेको बताए ।

उनले भने,‘हामीले ललितपुर महानगरपालिका क्षेत्रमा पर्यटकहरूको बसाइँलाई लामो पार्नको निमित्त पर्यटक बसको व्यवस्था गर्न गइरहेका छौं ।

विभिन्न किसिमका प्राविधिक समस्याले गर्दा यहाँ डेलिभरी भइरहेको छैन । अव हामीले पर्यटन एउटा साधन बसको व्यवस्थापन गर्न गइरहेका छौं त्यसको सुरुवाती बिन्दु भनेको पाटन ढोकाबाट सुरु पनि यही र अन्त्य पनि यहीँ हुने किसिमले तयार गरेका छौं ।’

मेयर महर्जनले बसको व्यवस्थापन भएपछि पर्यटन शुल्क संकलन गर्दा उनीहरुलाई ७२ घण्टा भित्रको मान्य अवधिसहितको सटल बसको टिकट दिने समेत बताए ।

 

सटल बस चलाएर ललितपरको मुख्य मुख्य पर्यटन क्षेत्र घुमाउने योजना रहेको उनको भनाइ छ । उनले ललितपुर क्षेत्रमा उत्पादित सामानहरु, हस्तकलाहरुको गुणस्तरमा ‘नो कम्प्रोमाईज एट अल’ भन्ने सिद्धान्त लिएर अगाडि बढ्नु पर्नेमा जोड दिए ।