काठमाडौं। मञ्जुश्री फाइनान्स लिमिटेडको सत्रौं वार्षिक साधारण सभा काठमाडौंको नयाँ बानेश्वरस्थित थापागाउँ बैंक्वेटमा सम्पन्न भएको छ। साधारण सभाले विभिन्न महत्त्वपूर्ण निर्णयहरू पारित गर्दै संस्थाको भावी कार्ययोजनाको खाका प्रस्तुत गर्‍यो।

सभाबाट आर्थिक वर्ष २०८०/०८१ का लागि प्रस्तावित ६.३५ प्रतिशत नगद लाभांश (लाभांशमा लाग्ने करसहित) वितरण गर्ने निर्णय पारित गरिएको छ।

सञ्चालक समितिमा संस्थापक समूहका तर्फबाट श्री यादव अधिकारी, श्री रामहरी शर्मा, र श्री सुमन प्रसाद अधिकारी तथा सर्वसाधारण समूहका तर्फबाट श्री सतीश गौतम चार वर्षका लागि निर्बिरोध निर्वाचित भएका छन्।

साधारण सभाले संस्थाको रजिस्टर्ड कार्यालयलाई काठमाडौं महानगरपालिका वडा नं. १० बाट वडा नं. ११ मा अवस्थित आफ्नै भवनमा स्थानान्तरण गर्न संस्थाको प्रवन्ध पत्र र नियमावलीमा संशोधन गर्ने निर्णय पनि पारित गर्‍यो।

मञ्जुश्री फाइनान्स लिमिटेडले गत मंसिर मसान्तसम्म २१ अर्ब रुपैयाँ निक्षेप संकलन तथा १७.५ अर्ब रुपैयाँ कर्जा प्रवाह गरेको जनाएको छ। देशभरका २७ शाखा र १ विस्तारित काउन्टरमार्फत १ लाख २० हजारभन्दा बढी ग्राहकलाई सेवा प्रदान गर्दै आएको फाइनान्सको केन्द्रीय कार्यालय नयाँ बानेश्वरमा रहेको छ।

संस्थानको भावी योजना र प्रतिबद्धता
फाइनान्सले वित्तीय सेवा क्षेत्रको दायरा विस्तार गर्दै उच्च स्तरको ग्राहक सन्तुष्टि र सेवा निरन्तरता सुनिश्चित गर्ने प्रतिबद्धता व्यक्त गरेको छ।