काठमाडौं। नेपाल हियरिङ एन्ड स्पिच क्लिनिकले नेपालमा श्रवण तथा वाणी सेवाको क्षेत्रमा सेवा प्रदान गरेको १५ वर्ष पूरा गरेको छ। विगत डेढ दशकदेखि क्लिनिकले श्रवण परीक्षण, श्रवणयन्त्र जडान तथा मिलान, कक्लियर इम्प्लान्ट सेवा, वाणी तथा भाषा उपचार, परामर्श तथा नियमित अनुगमनमार्फत हजारौँ सेवाग्राहीलाई सेवा प्रदान गर्दै आएको छ।

काठमाडौंको थापाथलीमा मुख्य कार्यालय रहेको क्लिनिकका शाखाहरू विराटनगर, पोखरा र नेपालगञ्जमा सञ्चालनमा छन्। साथै, भक्तपुरको ठिमीस्थित बीपीआई फाउन्डेसन, पुल्चोकस्थित अरुस लाइफस्टाइल अस्पताल तथा ग्वार्कोस्थित बीएनबी अस्पतालमा पनि आफ्नै श्रवण परीक्षण सेवा एकाइमार्फत सेवा प्रदान गर्दै आएको छ।

क्लिनिकमा अन्तर्राष्ट्रिय मापदण्डअनुसार निर्माण गरिएको ध्वनिरहित श्रवण परीक्षण कक्ष रहेको छ। उक्त कक्षमा उच्च घनत्वका ध्वनि अवरोधक प्यानल, दोहोरो तहका ध्वनि नियन्त्रणयुक्त जिप्सम भित्ताहरू, कम्पन नियन्त्रणयुक्त विशेष भुइँ तथा ध्वनि चुहावट रोक्ने विशेष ढोकाको प्रयोग गरिएको छ। यसले श्रवण परीक्षणलाई अझ शुद्ध, भरपर्दो र विश्वसनीय बनाउन सहयोग पुर्‍याउँछ।

१५ वर्षको अवधिमा क्लिनिकले ६० भन्दा बढी कक्लियर इम्प्लान्ट सेवा, २५ हजारभन्दा बढी श्रवणयन्त्र जडान तथा मिलान र ४० हजारभन्दा बढी श्रवण परीक्षण सम्पन्न गरिसकेको छ।

नेपाल हियरिङ एन्ड स्पिच क्लिनिक नेपालमा फोनाक, सिग्निया र स्टार्की जस्ता विश्वप्रसिद्ध श्रवणयन्त्र उत्पादक कम्पनीहरूको आधिकारिक वितरक पनि हो। क्लिनिकले श्रवणयन्त्र छनोट, जडान, आवश्यकताअनुसार मिलान, परामर्श, वारेन्टी सेवा, नियमित अनुगमन, प्राविधिक सहयोग, मर्मत–सम्भार तथा आजीवन सहयोग सेवा प्रदान गर्दै आएको छ।

क्लिनिकका अध्यक्ष तथा संस्थापक पुरुषोत्तम भुर्तेलको नेतृत्वमा हाल ३५ जनाभन्दा बढी दक्ष जनशक्ति कार्यरत छन्। यसमा श्रवण विशेषज्ञ, वाणी तथा भाषा विशेषज्ञ, साथै व्यवस्थापन र सञ्चालन टोली आबद्ध छन्।

१५ वर्षको यो यात्रा क्लिनिकका लागि सेवा, विश्वास र व्यावसायिक उत्कृष्टताको महत्वपूर्ण उपलब्धि हो। आगामी दिनमा पनि नेपाल हियरिङ एन्ड स्पिच क्लिनिकले आधुनिक प्रविधि तथा सेवाग्राही–केन्द्रित सेवामार्फत श्रवण तथा वाणी सेवालाई अझ प्रभावकारी, गुणस्तरीय र सर्वसुलभ बनाउँदै लैजाने लक्ष्य लिएको छ।