काठमाडौं, असार २६ — महालक्ष्मी विकास बैंकले काठमाडौं महानगरपालिका–३०, ज्ञानेश्वरस्थित शाखामा कफी लाउञ्जसहितको डिजिटल हब सञ्चालनमा ल्याएको छ।

बैंकका सञ्चालक समितिका अध्यक्ष राजेश उपाध्यायले आइतबार आयोजित एक समारोहबीच डिजिटल हबको उद्घाटन गरेका हुन्। कार्यक्रममा बैंकका सञ्चालक समिति सदस्य, प्रमुख कार्यकारी अधिकृत, उच्च व्यवस्थापनका पदाधिकारी तथा कर्मचारीहरूको उपस्थिति रहेको थियो।

बैंकका अनुसार डिजिटल बैंकिङ सेवालाई थप आधुनिक, सुरक्षित, प्रविधिमैत्री तथा ग्राहक–मैत्री बनाउने उद्देश्यले डिजिटल हबसँगै कफी लाउञ्जको सुविधा पनि थप गरिएको हो। यसमार्फत ग्राहकले आरामदायी वातावरणमा बसेर नगद जम्मा गर्ने, नगद झिक्ने, चेक क्लियरिङ गर्ने तथा अन्य विद्युतीय बैंकिङ सेवा लिन सक्नेछन्।

बैंकले यस प्रकारको कफी लाउञ्जसहितको डिजिटल बैंकिङ सेवा नेपालमै पहिलोपटक सञ्चालनमा ल्याएको दाबी गरेको छ।

युवापुस्तालाई डिजिटल बैंकिङतर्फ आकर्षित गर्ने तथा ग्राहकको पहुँच विस्तार गर्ने उद्देश्यले स्थापना गरिएको डिजिटल हबमार्फत डिजिटल बैंकिङ सेवासम्बन्धी परामर्शसमेत उपलब्ध गराइने बैंकले जनाएको छ। यसले ग्राहकका लागि सिकाइ र डिजिटल बैंकिङ अनुभवको केन्द्रका रूपमा काम गर्ने अपेक्षा बैंकको छ।

बैंकले नेपाल राष्ट्र बैंकको नियामकीय स्यान्डबक्स (Regulatory Sandbox) अवधारणाअनुसार वित्तीय सेवामा नवप्रवर्तनलाई प्रोत्साहन गर्दै आगामी दिनमा नयाँ प्रविधिमैत्री वित्तीय सेवा ग्राहकसमक्ष ल्याउने प्रतिबद्धता पनि जनाएको छ।