काठमाडौँ । गोर्खाज फाइनान्सको वार्षिक साधारण सभा व्यवस्थापन, सञ्चालक समिति र शेयरधनीहरुमा देखिएको विवादका कारण भाँडिएको छ । कम्पनीले आज (पुष २९ गते) बिहान ११ बजे पानस बैंक्वेट एण्ड इभेन्ट भेन्यु, बसुन्धरा, काठमाडौँमा ३०औं वार्षिक साधारण सभा बोलाएको थियो । तर, सभा सुरु हुन नपाउँदै व्यवस्थापन समिति र सञ्चालक समितिबीचको आन्तरिक विवाद सतहमा आएपछि सभा स्थगित भएको हो ।

सभामा कम्पनीका व्यवस्थापन समितिले काम गर्न नसकेको र गोर्खाज फाइनान्स आफ्ना मान्छे भर्ति गराउने स्थानमा परिणत भएको आरोप लगाइएको छ । यससँगै, सञ्चालक समितिले गैरकानुनी रूपमा प्रमुख कार्यकारी अधिकृत (सीईओ) नियुक्त गरेको विषयमा गम्भीर प्रश्न उठेको छ । यसले गर्दा साधारण सभा अव्यवस्थित बनेको र बैठक नै स्थगित गर्नुपरेको जनाइएको छ ।

सञ्चालक समितिको लफडाले संस्थाको वित्तीय अवस्था पनि गम्भीर संकटतर्फ धकेलिएको देखिन्छ । कम्पनीमा कालोसूचीमा परेका लगानीकर्ताले सीईओ नियुक्त गर्न खोजेको भन्दै तीव्र विरोध भइरहेको छ । गोर्खाज फाइनान्सको अध्यक्ष गौरव बुढाथोकीका साथै सञ्चालक सदस्यहरूमा कल्पना खापुङ, युबराज राई, नरेन्द्र कुमार अग्रवाल, र निलम बोहरा रहेका छन् । तर, सञ्चालक समितिभित्रै विभाजन देखिएको छ, जसका कारण व्यवस्थापन प्रक्रियामा असहमति चुलिएको छ ।

वर्तमान सीईओ प्रकाश चन्द्र अधिकारीलाई सञ्चालक समितिको पुष १४ गतेको ५०३औं बैठकले आगामी चार वर्षका लागि नियुक्त गरेको थियो । तर, शेयरधनीहरूले अधिकारीको नियुक्ति गैरकानुनी भएको दाबी गरेका छन् । यसअघि, सन्तोष कुमार घिमिरेले सञ्चालक समितिको आन्तरिक विवादकै कारण सीईओ पद छोडेको र संस्थामा स्थायित्व नआएको आरोप लगाइएको छ ।

फाइनान्सको वित्तीय स्थिति कमजोर छ । खराब कर्जाको मात्रा लगातार बढ्दै जाँदा कम्पनीको ऋण व्यवस्थापन क्षमता शून्यप्रायः देखिएको छ । सभाका क्रममा वित्तीय सूचकहरूमा आएको गिरावट र संस्थाको संचालनमा भएको लापरबाहीप्रति शेयरधनीहरूले गम्भीर असन्तोष व्यक्त गरेका छन् । संस्थाभित्र चलखेल र अस्थिरताको प्रश्न उठेसँगै साधारण सभा स्थगित भएको हो ।

अहिले कम्पनीको वित्तीय स्वास्थ्य सुधार गर्ने दिशामा कुनै ठोस कदम चाल्न सकेको छैन । कर्जाको स्तरोन्नति, आन्तरिक व्यवस्थापन सुधार र सञ्चालक समितिको स्थायित्वजस्ता प्रमुख विषयमा कुनै स्पष्ट रणनीति नहुँदा गोर्खाज फाइनान्स अझै गम्भीर संकटतर्फ उन्मुख छ । शेयरधनीहरूका अनुसार कम्पनीले हालसम्म कुनै पनि विश्वासिलो सुधार योजना सार्वजनिक नगरेको र व्यवस्थापनको उपयुक्त मार्गनिर्देशन नभएको स्थिति देखिन्छ ।

साधारण सभा स्थगित गर्नुको प्रमुख कारण गणपुरक संख्या नपुग्नु भएको भनिए पनि आन्तरिक विवाद र सीईओ नियुक्तिसम्बन्धी प्रश्न नै मूल कारण रहेको बताइएको छ । यस्तै, सञ्चालक र व्यवस्थापन पक्षबीचको विवादले गर्दा संस्थाको प्रतिष्ठामा पनि आँच आएको छ । उस्तै पनि टाट पल्टिन लागेको गोर्खाज फाइनान्स अहिले ठूलो संकटतर्फ जान सक्ने खतरा देखिएको छ ।