काठमाडौं । नेपाल बैंकको अध्यक्ष पदमा थान प्रसाद पंज्ञानी नियुक्त भएका छन् । बैंकको सञ्चालक समितिले फागुन ९ गते बसेको बैठकमा उनलाई अध्यक्षमा नियुक्त गरेको हो ।

पंज्ञानीले नेपाल राष्ट्र बैंकका गभर्नर महाप्रसाद अधिकारीबाट अध्यक्ष पदको पद तथा गोपनियताको शपथ ग्रहण गरिसकेका छन् । बैंकका कम्पनी सचिव केशव प्रसाद भण्डारीले यसको जानकारी दिए ।

थान प्रसाद पंज्ञानी गत भदौ २७ गतेदेखि नेपाल बैंकको सञ्चालक समितिमा अर्थमन्त्रालयको प्रतिनिधित्व गर्दै आएका थिए । उनी अर्थमन्त्रालयमा प्रशासन विभागका सहसचिव पनि हुन् ।

यसअघि अध्यक्ष रहेका डा. चन्द्रबहादुर अधिकारी विरुद्ध अख्तियार दुरुपयोग अनुसन्धान आयोगमा उजुरी परेपछि उनले राजीनामा दिएका थिए । तर, उनी सञ्चालक पदमा भने कायम रहेका छन् । अधिकारीमाथि बैंकले प्रवाह गर्ने कर्जामा कमिसन लिएको आरोपमा अख्तियार दुरुपयोग अनुसन्धान आयोगले छानबिन गरिरहेको छ ।

पंज्ञानीको नियुक्तिले नेपाल बैंकको नेतृत्वमा नयाँ अध्याय सुरु भएको छ । उनको नेतृत्वमा बैंकले आगामी दिनमा कस्तो रणनीति अवलम्बन गर्छ, यसको सबैको निगाही रहेको छ ।