काठमाडौं, चैत १३ – काठमाडौं टेक्निकल स्कुल (केटीएस) को औपचारिक उद्घाटन सम्पन्न भएको छ। नेपाल उद्योग वाणिज्य महासंघका अध्यक्ष चन्द्रप्रसाद ढकालले मंगलबार आयोजित समारोहमा प्राविधिक शिक्षाले मुलुकको अर्थतन्त्र र रोजगारी क्षेत्रमा सकारात्मक प्रभाव पार्ने विश्वास व्यक्त गर्नुभयो।

समारोहमा अध्यक्ष ढकालले आइएमई ग्रुपको व्यावसायिक यात्राबारे जानकारी गराउँदै, अब समूहले प्राविधिक जनशक्ति उत्पादनमा समेत योगदान दिने बताउनुभयो। उहाँका अनुसार, आइएमई ग्रुपअन्तर्गतका विभिन्न उद्योग तथा परियोजनाहरूले हालसम्म २५ हजारभन्दा बढीलाई प्रत्यक्ष रोजगारी दिइसकेको छ।

उहाँले भन्नुभयो, “काठमाडौं टेक्निकल स्कुलको सञ्चालनसँगै हजारौं युवाले सीप प्राप्त गरी स्वदेशमै रोजगारी वा स्वरोजगारको अवसर पाउनेछन्। प्राविधिक शिक्षाले नेपाली युवालाई दक्ष बनाएर उनीहरूलाई गुणस्तरीय रोजगारी दिलाउन मद्दत गर्नेछ।”

बेरोजगारी र युवा पलायन रोक्न सीपमूलक शिक्षाको आवश्यकता
अध्यक्ष ढकालका अनुसार, बेरोजगारी र विदेश पलायन अहिले नेपालको प्रमुख चुनौती बनेको छ। पछिल्लो आर्थिक वर्षमा मात्र ७ लाख १४ हजारभन्दा बढी नेपाली श्रम स्वीकृति लिएर विदेश गएका छन्। तीमध्ये अधिकांश अदक्ष वा सामान्य सीप भएका श्रमिक रहेको उल्लेख गर्दै उहाँले दक्षता अभावका कारण नेपाली श्रमिकहरूले न्यून पारिश्रमिकमा कठिन परिश्रम गर्नुपरेको बताउनुभयो।

उहाँले जोड दिँदै भन्नुभयो, “हाम्रो उद्देश्य युवालाई केवल रोजगारीका लागि तयार गर्नु मात्र होइन, उनीहरूलाई उद्यमशीलतामा प्रवर्द्धन गर्दै स्वदेशमै अवसर सिर्जना गराउनु हो।”

केटीएसको लक्ष्य– एक दशकमा १ लाख दक्ष जनशक्ति उत्पादन
काठमाडौं टेक्निकल स्कुलले आगामी १० वर्षमा १ लाखभन्दा बढी दक्ष जनशक्ति उत्पादन गर्ने लक्ष्य राखेको छ। संस्थाले तीन दर्जनभन्दा बढी रोजगारमूलक तथा स्वरोजगारमूलक तालिमहरू प्रदान गर्नेछ। आतिथ्य सेवा, सूचना प्रविधि, स्वास्थ्य, निर्माण, कृषि लगायतका क्षेत्रमा आधुनिक सीपयुक्त तालिम दिइनेछ।

अध्यक्ष ढकालले नेपालमा गुणस्तरीय प्राविधिक शिक्षाको आवश्यकता रहेको उल्लेख गर्दै, सरकारलाई पनि यस क्षेत्रको प्रवर्द्धनमा सहकार्य गर्न आग्रह गर्नुभयो। उहाँले दक्ष जनशक्ति उत्पादनका लागि सीप प्रमाणीकरणको व्यवस्था गरी राष्ट्रिय तथा अन्तर्राष्ट्रिय मान्यता दिलाउनुपर्ने आवश्यकता औंल्याउनुभयो।

कार्यक्रममा श्रम, रोजगार तथा सामाजिक सुरक्षा मन्त्री, उच्च सरकारी अधिकारीहरू, व्यवसायी, विद्यार्थी तथा अन्य विशिष्ट व्यक्तिहरूको उपस्थिति रहेको थियो।

नेपालमै उद्यमशीलता र रोजगारीका अवसर बढाउने लक्ष्य
काठमाडौं टेक्निकल स्कुलले नेपाली युवालाई विश्वस्तरीय तालिम प्रदान गर्दै उनीहरूलाई नेपालमै उद्यमशील बनाउन जोड दिने बताइएको छ। विभिन्न राष्ट्रिय तथा अन्तर्राष्ट्रिय साझेदार संस्थासँग सहकार्य गरी आधुनिक प्रविधिमा आधारित व्यावसायिक शिक्षा उपलब्ध गराइनेछ।

अध्यक्ष ढकालले अन्त्यमा भन्नुभयो, “शिक्षा प्रगतिको आधार हो भने प्राविधिक शिक्षा आर्थिक र सामाजिक परिवर्तनको इञ्जिन हो। काठमाडौं टेक्निकल स्कुलले त्यसै परिवर्तनको संवाहकको भूमिका निर्वाह गर्नेछ।”