काठमाडौं । युनाइटेड अजोड इन्स्योरेन्सले आगामी असार ३१ गते वार्षिक साधारणसभा बोलाएको छ। कम्पनीको सभा काठमाडौंको भाटभटेनीस्थित अम्रपाली ब्याङ्क्वेटमा बिहान १०ः३० बजे बस्नेछ।

सभाले गत आर्थिक वर्षको वार्षिक प्रतिवेदन पारित गर्नुका साथै चालु आर्थिक वर्षका लागि लेखापरीक्षक नियुक्ति तथा निजको पारिश्रमिक निर्धारण गर्ने प्रस्तावमाथि छलफल गर्नेछ।

त्यस्तै, कम्पनीले हाल कायम चुक्ता पुँजी २ अर्ब ३१ करोड रुपैयाँको ०.२२५६ प्रतिशतका दरले कर प्रयोजनका लागि नगद लाभांश वितरण गर्ने प्रस्ताव पनि सभामा पेश गर्ने भएको छ।

सञ्चालक समितिले प्रस्ताव गरेको हालको चुक्ता पुँजीको ४.२८५७ प्रतिशत बराबर ९ करोड ९० लाख रुपैयाँको बोनस शेयर जारी गर्ने विशेष प्रस्तावमाथि पनि साधारणसभाले निर्णय गर्नेछ।

बोनस शेयर वितरणपछि कम्पनीको जारी पुँजी २ अर्ब ५४ करोड १० लाख रुपैयाँबाट बढेर २ अर्ब ६४ करोड रुपैयाँ पुग्नेछ। सोहीअनुसार कम्पनीको प्रबन्धपत्र तथा नियमावली संशोधन गर्ने प्रस्ताव पनि सभाको विशेष एजेन्डामा समावेश गरिएको छ।

यसका साथै सम्बन्धित नियामक निकायबाट आवश्यक संशोधन, थपघट वा परिमार्जन गर्न निर्देशन प्राप्त भएमा सोअनुसार कम्पनीको प्रबन्धपत्र तथा नियमावलीमा परिवर्तन गर्न सञ्चालक समितिलाई पूर्ण अधिकार प्रदान गर्ने प्रस्तावसमेत सभामा पेश गरिनेछ।