काठमाडौं । फोटोनले भालुवाङ, बागलुङ, लालबन्दी, चपुर र लहानमा पाँच नयाँ आधिकारिक सेवा केन्द्र सञ्चालनमा ल्याएको छ। यससँगै कम्पनीको देशव्यापी बिक्रीपछिको सेवा सञ्जाल २१ भन्दा बढी स्थानमा विस्तार भएको छ।

कम्पनीका अनुसार नयाँ सेवा केन्द्र सञ्चालनसँगै देशभरका ग्राहकले विद्युतीय सवारीसाधनको मर्मत, प्राविधिक परीक्षण तथा आवश्यक प्राविधिक सहायता आफ्नै क्षेत्रबाट सहज रूपमा प्राप्त गर्न सक्नेछन्।

यी सेवा केन्द्रहरूले सम्बन्धित क्षेत्र तथा आसपासका स्थानका फोटोनका ग्राहकलाई छिटो, भरपर्दो र सुविधाजनक सेवा उपलब्ध गराउनेछन्। विशेषगरी शैक्षिक संस्था, ढुवानी व्यवसाय तथा व्यावसायिक सवारीसाधन सञ्चालकका लागि यो सेवा विस्तार उपयोगी हुने कम्पनीले जनाएको छ।

आधिकारिक सेवा केन्द्रमार्फत नियमित मर्मतसम्भार, सवारीसाधनको प्राविधिक परीक्षण, मर्मत तथा वारेन्टीसम्बन्धी सेवा प्रदान गरिनेछ। साथै, यी केन्द्रमा विद्युतीय सवारीसाधनका लागि आवश्यक आधुनिक उपकरण, तालिमप्राप्त प्राविधिक र कम्पनीका आधिकारिक स्पेयर पार्ट्सको व्यवस्था गरिएको छ।

नेपालमा विद्युतीय सवारीसाधनको प्रयोग बढ्दै गएसँगै दक्ष प्राविधिक सेवा आवश्यक बन्दै गएको भन्दै कम्पनीले प्रमुख सहरबाहिर पनि सेवा विस्तार गरेको जनाएको छ। यसबाट सवारीसाधनको सुरक्षा र विश्वसनीयता अभिवृद्धि हुनुका साथै सवारीसाधनको आयु बढ्ने र बिक्रीपछिको सेवा लिन टाढा जानुपर्ने बाध्यता कम हुने अपेक्षा गरिएको छ।

कम्पनीका अनुसार नियमित तथा रोकथाममूलक मर्मतसम्भार, छिटो सेवा, पारदर्शी प्रक्रिया र नेपालको भौगोलिक अवस्थाअनुसारको सेवा व्यवस्थामार्फत व्यावसायिक सवारीसाधनलाई निरन्तर सञ्चालनमा राख्ने लक्ष्यका साथ सेवा सञ्जाल विस्तार गरिएको हो।

नयाँ सेवा केन्द्रहरू दुर्गम, अर्धशहरी तथा क्षेत्रीय बजारमा आधिकारिक बिक्रीपछिका सेवा केन्द्रका रूपमा सञ्चालन हुनेछन्। सबै केन्द्रबाट समान गुणस्तरको सेवा तथा सहज पहुँच सुनिश्चित गरिने कम्पनीको भनाइ छ।

भालुवाङ, बागलुङ, लालबन्दी, चपुर र लहानलाई सेवा सञ्जालमा समेट्दै फोटोनले ग्राहकको दीर्घकालीन विश्वास मजबुत बनाउनुका साथै नेपालमा विद्युतीय व्यावसायिक सवारीसाधनको विस्तारमा योगदान पुर्‍याउने प्रतिबद्धता दोहोर्‍याएको छ।

कम्पनीबारे

एमएडब्लू कमर्सियल भेहिकल्स प्रालि नेपालका लागि फोटोन सवारीसाधनको आधिकारिक वितरक हो। कम्पनीले देशभर फैलिएको शोरुम तथा सेवा केन्द्रको सञ्जालमार्फत व्यावसायिक सवारीसाधन बिक्री, बिक्रीपछिको सेवा, आधिकारिक स्पेयर पार्ट्स तथा ग्राहककेन्द्रित यातायात समाधान उपलब्ध गराउँदै आएको छ।