काठमाडौं । सन नेपाल लाइफ इन्स्योरेन्स कम्पनीले बैशाख ३० गतेदेखि हकप्रद सेयर निष्काशन तथा बिक्री खुला गर्ने भएको छ। कम्पनीले हालको ३ अर्ब ९६ करोड १६ लाख रुपैयाँ चुक्ता पुँजीको २७ प्रतिशत अनुपातमा अर्थात् १ कित्तामा नयाँ ०.२७ कित्ता दरले हकप्रद सेयर ल्याउन लागेको हो।

यसअन्तर्गत कम्पनीले १ अर्ब ६ करोड ९६ लाख ३२ हजार रुपैयाँ बराबरका १ करोड ६ लाख ९६ हजार ३२० कित्ता सेयर प्रतिकित्ता १ सय रुपैयाँमा बिक्री गर्नेछ। हकप्रद सेयर बिक्रीपछि कम्पनीको चुक्ता पुँजी ५ अर्ब ३ करोड १२ लाख ३२ हजार रुपैयाँ पुग्नेछ।

कम्पनीले बैशाख ५ गते बुकक्लोज गरेकोले बैशाख ४ गतेसम्म नेप्सेमा कारोबार भएका सेयरधनीहरूले मात्र आवेदन दिन पाउनेछन्। हकप्रद सेयरका लागि आवेदन दिने अन्तिम म्याद जेठ १९ गतेसम्म तोकिएको छ।

हकप्रद निष्काशन तथा बिक्री प्रबन्धक नेपाल एसबिआई मर्चेण्ट बैंकिङ्ग रहेको छ। सेयरधनीहरूले बिक्री प्रबन्धकसँगै सन नेपाल लाइफको केन्द्रीय तथा क्षेत्रीय कार्यालय, आस्वा सेवामा सहभागी बैंक तथा वित्तीय संस्था र मेरोसेयर एपमार्फत आवेदन दिन सक्नेछन्।

केयर रेटिङ्गस नेपालले कम्पनीलाई ‘केयर एनपी ट्रिपल बी’ इस्यूअर रेटिङ्ग प्रदान गरेको छ, जसले कम्पनीको वित्तीय दायित्व बहन क्षमता औसत रहेको संकेत गर्दछ।